Otbasynda asa aýyr jaǵdaıǵa tap bolǵan 342 bala memleket qamqorlyǵyna alyndy
ASTANA. KAZINFORM — Bas prokýror Berik Asylov balalardyń qaýipsizdigin qamtamasyz etý jáne olarǵa qatysty quqyq buzýshylyqtardyń aldyn alý maqsatynda prokýratýra qabyldap jatqan keshendi sharalar týraly aıtty.
2023 jyldan bastap Bas prokýratýranyń bastamasymen elimizdiń barlyq óńirinde balalardyń quqyqtaryn qorǵaýǵa, zorlyq-zombylyq faktilerin anyqtaýǵa jáne ýaqtyly kómek kórsetýge baǵyttalǵan eki joba — «URPAQ» jáne «Baqytty jáne Qaýipsiz Balalyq Shaq» júzege asyrylýda.
Prokýrorlar 63 myń otbasynyń turmystyq jaǵdaıyn tekserdi
«Baqytty jáne Qaýipsiz Balalyq Shaq» jobasy aıasynda prokýrorlar balalarǵa qatysty qaýip nemese zorlyq-zombylyq faktilerin anyqtaý úshin 63 myńnan astam otbasyna bardy.
— Qamqorshylarǵa, asyrap alýshylarǵa, ata-analarǵa jáne basqa da tulǵalarǵa qatysty 93 sotqa deıingi tergep-tekserý bastaldy. 11 myń ata-ana men zańdy ókilder bala tárbıeleý mindetterin tıisinshe oryndamaǵany úshin ákimshilik jaýapkershilikke tartyldy. Sonymen qatar asa aýyr jaǵdaıǵa tap bolǵan 342 bala qolaısyz otbasylardan memleket qamqorlyǵyna alyndy, — dedi Bas prokýror.
Sondaı-aq, tekserýlerdiń nátıjesinde:
• 54 ata-ananyń quqyqtaryn shekteý jáne 92 ata-ana quqyǵynan tolyq aıyrý týraly talap-aryzdar berildi;
• 2 myńnan astam otbasyǵa materıaldyq kómek kórsetildi (alǵashqy kómek zattary, azyq-túlik, oqý quraldar, kómir jáne basqalary);
• 1 myńnan astam otbasyǵa turǵyn úı máselesi boıynsha qoldaý kórsetildi;
• 10 myń otbasyǵa medıtsınalyq jáne áleýmettik kómek usynyldy;
• Balalarǵa 4,5 mlrd teńge kóleminde alıment óndirip alyndy.
«URPAQ» jobasynyń maqsaty qandaı?
Bul joba otbasylardaǵy jasyryn zorlyq-zombylyq túrlerin anyqtaýǵa baǵyttalǵan. Ol zardap shekkenderge psıhologııalyq jáne zańdyq qoldaý kórsetý boıynsha keshendi kómekti qamtıdy.
— Ár bala kómek árdaıym qasynda ekenin jáne ol qıyndyqpen jalǵyz qalmaıtynyn bilýi kerek, — dedi Berik Asylov.
Jedel áreket etý úshin kelesi quraldar engizildi:
• Balalardyń quqyqtaryn buzý týraly aqparat jınaý úshin Telegram chat-bottary;
• Mektepterde, memlekettik mekemelerde jáne qoǵamdyq oryndarda QR-kodtarornatylyp, máselelerin jedel habarlaýǵa múmkindik berildi.
Berik Asylovtyń sózinshe, joba nátıje kórsetip keledi.
— Máselen, ShQO-da eki býllıng faktisi toqtatyldy: 12 jastaǵy balaǵa jasalǵan qorlyq jáne kolledj stýdentine kórsetilgen qysym. Kináliler tártiptik jazaǵa tartylyp, profılaktıkalyq jumys júrgizildi. Budan bólek, qorqytyp aqsha alý faktileri boıynsha qylmystyq ister qozǵaldy. Mysaly, 16 jastaǵy stýdent jasóspirimderden aqsha talap etip, olarǵa pyshaqpen qoqan-loqy jasaǵan. Basqa mektepte joǵary synyp oqýshylary 7-synyp oqýshysynan aqsha bopsalaǵan. Kináliler mektepishilik esepke alynyp, ata-analary ákimshilik jaýapkershilikke tartyldy, — dep atap ótti ol.
Qysqa ýaqyt ishinde oqýshylar men muǵalimder tarapynan oryn alǵan buzaqylyq pen býllıng týraly 1 809 habarlama tústi. Tekserý nátıjeleri boıynsha 192 adam ákimshilik jaýapkershilikke tartyldy; 1 617 adammen profılaktıkalyq áńgimeler men túsindirý jumystary júrgizildi.
Berik Asylov osy jumystyń mańyzdylyǵyn atap ótti.
— Qazaqstandaǵy árbir bala ózin qaýipsiz sezinýi kerek. Biz olardyń quqyqtaryn qorǵaý jáne baqytty balalyq shaqty qamtamasyz etý úshin bar kúshimizdi salamyz, — dep túıindedi prokýror.
Osyǵan deıin bas prokýror Berik Asylov elimizde jol apaty kóbeıgenin aıtqanyn jazǵan edik.