Otbasylyq úlgidegi balalar aýylyna kimder tárbıeshi bola almaıdy
ASTANA. KAZINFORM – Oqý-aǵartý mınıstri mindetin atqarýshynyń buıryǵymen otbasylyq úlgidegi balalar aýyly men jasóspirimder úıleriniń qyzmetin retteıtin normatıvtik quqyqtyq aktilerge ózgertý engizildi.
Qoldanysqa engiziletin ózgertýlerge sáıkes, endi tárbıeshilerge qoıylatyn talaptar naqtylanady. Tárbıeshi óz qyzmetinde Bala quqyqtary týraly BUU Konventsııasyn, Qazaqstan Respýblıkasynyń Konstıtýtsııasyn, «Bilim týraly» zańdy jáne balalardyń quqyqtaryn qorǵaý salasyndaǵy normatıvtik quqyqtyq aktilerdi basshylyqqa alady.
Tárbıeshi bolýǵa ruqsat berilmeıtin adamdardyń tizimi aıqyndalady. Sot áreketke qabiletsiz nemese áreketke qabileti shekteýli dep tanyǵan adamdar tárbıeshi bola almaıdy.
Balalar aýylyndaǵy tárbıelenýshilerdiń bilim alýyna jaǵdaı jasaý talaby engiziledi. Balalar aýylynyń ákimshiligi tárbıelenýshi oqý ornynda bilim alǵan jaǵdaıda, onyń bilim alýy úshin tıisti jaǵdaı jasaýǵa mindetti. Tárbıelenýshilerdiń áleýmettik quqyqtary naqtylanady. Jasóspirimder úıindegi tárbıelenýshiler Qazaqstan Respýblıkasynyń Áleýmettik kodeksinde kózdelgen jeńildikterdi paıdalanýǵa quqyly.
Tálimger bolýǵa qoıylatyn talaptar da naqtylana túsedi. Sot áreketke qabiletsiz nemese áreketke qabileti shekteýli dep tanyǵan adamdar, sondaı-aq jubaıyn sot áreketke qabiletsiz nemese áreketke qabileti shekteýli dep tanyǵan adamdar tálimger bola almaıdy.
Tálimgerlikke ótinish berý kezinde jubaıynyń kelisimine qatysty talap ózgertiledi. Eger erli-zaıyptylar is júzinde otbasylyq qatynastaryn toqtatsa nemese bir jyldan astam ýaqyt bólek tursa, jubaıynyń kelisimi talap etilmeıdi.
Sonymen qatar jetim balalarǵa, ata-anasynyń qamqorlyǵynsyz qalǵan balalarǵa tálimgerlikti uıymdastyrý qaǵıdalary bekitiledi.
Buǵan deıin ShQO-da prokýratýra aralasqannan keıin úsh jetim bala turǵyn úı kezegine qaıta qoıylǵanyn jazǵan edik.
