Otbasylyq dástúrden bastalǵan kásip: ShQO-lyq kásipker jasaǵan qara sabynǵa Qytaıdan da tapsyrys túsedi
ÓSKEMEN. KAZINFORM – Shyǵys Qazaqstan oblysy Zaısan aýdanynda turatyn Sandýǵash Aıtqajyqyzy qara sabyn jasaý ádisin zamanaýı saýda talaptaryna beıimdegen. Qazir kásipkerdiń ónimderine Qazaqstannyń ondaǵan qalasynan bólek, Qytaıdan da suranys bar. Aldaǵy ýaqytta ol brendin patenttep almaq.
Otbasylyq dástúrden bastalǵan óndiris
Sandýǵash Aıtqajyqyzy bul kásipke kezdeısoq kelmegen. Qara sabyn jasaý óneri onyń otbasynda burynnan bar. Anasy bul ispen qyzy dúnıege kelmeı turyp aınalysqan. Al sabyn daıyndaýdyń qyr-syryn sheshesine enesi úıretken eken.
- Bala kezimnen osy ónimdi paıdalanyp óstim. Sondyqtan bala kúngi tanys dúnıeni kásipke aınaldyrdym, - deıdi Sandýǵash.
Keıipkerimiz Qytaı Halyq Respýblıkasynyń Altaı aımaǵynda dúnıege kelgen. 2006 jyly otbasymen birge tarıhı otanyna oralyp, Zaısanǵa qonys tepti. Alǵashynda tehnolog mamandyǵyn meńgerýge nıettengenimen, anasynyń densaýlyǵyna baılanysty oqýyn aıaqtaı almady. Keıin saýda salasyna bet buryp, 15 jylǵa jýyq tájirıbe jınaqtady.
2012 jyly jeke kásibin ashyp, alǵashqy kezeńde alyp-satýmen aınalysty. Al sońǵy úsh jylda óz ónimderin óndirýge basymdyq berip keledi. Bul baǵytta aldymen qajetti qujattardy rásimdep, ónimdi naryqqa tanytý jumystaryn júrgizgen. Qazir shaǵyn otbasylyq kásipte bes adam eńbek etedi.
Kásipkerdiń negizgi ónimi - dástúrli ádispen daıyndalatyn qara sabyn. Odan bólek, shash kútimine arnalǵan shampýndar, qara zere maıy, jýsan, jalbyz jáne zimbir qosylǵan sabyn túrleri bar. Jalpy, tutynýshylarǵa usynylatyn ónim sany 30 túrge jetedi.
- Óndiristiń ereksheligi - shıkizattyń basym bóligi tabıǵı bolýy jáne daıyn ónimniń qolmen ázirlenýi. Bul istiń tehnologııasyn tereńirek meńgerý úshin Qytaıdaǵy Shyńjań-Uıǵyr avtonomııalyq aýdanyna arnaıy baryp, tájirıbe jınaqtadym. Qara sabynnyń daıyndalýy bir kúnde bitetin jumys emes. Eń aldymen qajetti dárilik shópter jınalyp, keptiriledi. Odan keıin olardy órtep, alynǵan kúldi sýǵa qaınatyp, tundyrý qajet. Kelesi kúni tunbanyń suıyq bóligi súzilip alynady. Ony uzaq ýaqyt qaınatý nátıjesinde shóp quramyndaǵy tabıǵı silti alynady, - deıdi Sandýǵash Aıtqajyqyzy.
Odan soń osy silti maldyń ish maıymen aralastyrylady. Shıkizat retinde qoı, eshki nemese sıyrdyń maıy paıdalanylady. Qospany alty-jeti saǵat boıy úzdiksiz aralastyrý qajet. Barlyq jumys qol kúshimen atqarylady. Daıyn bolǵan sabyn arnaıy qaptalyp, tapsyrys berýshilerge jóneltiledi.
Sandýǵashtyń aıtýynsha, qara sabynnyń basty ereksheligi - quramynda sıntetıkalyq qospalardyń bolmaýy. Kásipker ony teri men shash kútimine arnalǵan dástúrli ónim retinde usynady. Ásirese bezeý, qaıyzǵaq jáne teriniń túrli máselelerine baılanysty osy sabyndy izdep keletin tutynýshylar bar. Degenmen mundaı ónimderdi medıtsınalyq emniń ornyna qoldanýǵa bolmaıdy.
Qazaqstannyń ondaǵan qalasyna jetkiziledi
Búginde Sandýǵashtyń ónimderi tek Zaısan turǵyndaryna ǵana emes, elimizdiń ózge óńirlerindegi tutynýshylarǵa da qoljetimdi. Ol ónimderdi satýda áleýmettik jeliniń múmkindigin tıimdi paıdalanyp otyr. Ásirese TikTok platformasyndaǵy tikeleı efırler arqyly tapsyrys qabyldaıdy. Efır barysynda taýarlardyń quramyn, daıyndalý erekshelikterin jáne qoldaný tásilderin túsindiredi.
- Qazaqstannyń ondaǵan qalasynda ónimderimdi turaqty alyp, qaıta satýmen aınalysatyn deldaldar qalyptasqan. Qytaıdyń bes qalasynda da osyndaı seriktester bar. Zaısannyń shekaralas ornalasýy kórshi elge taýar jóneltýge de múmkindik berip otyr. Ásirese sabyn men taryǵa tapsyrys beretinder kezdesedi, - deıdi kásipker.
Ónimderdiń baǵasy da ártúrli. Máselen, qara sabynnyń ortasha quny - 1500 teńge bolsa, shampýndardyń baǵasy 6000 teńgege deıin jetedi.
Kásibin balalaryna amanat etpek
Sandýǵashtyń óndirisi - otbasylyq is. Jubaıy, anasy men enesi kásiptiń damýyna qoldaý kórsetip keledi. Tórt balanyń anasy shaǵyn óndiristi bolashaqta balalaryna qaldyrýdy da oılastyryp qoıǵan. Onyń paıymynsha, ýaqyt talabyna saı damyǵan kásipti keıingi býyn jańa deńgeıge kótere alady.
Qazir keıipkerimiz oblysta júzege asyrylyp jatqan «Bir aýyl - bir ónim» jobasy aıasyndaǵy kórmelerge turaqty qatysyp júr. Bıyl Katonqaraǵaı aýdanynda ótken «Altaı - túrki áleminiń altyn besigi» halyqaralyq festıvalinde de óz taýarlaryn tanystyrdy.
Endi kásipker brendin patentteý úshin qajetti qujattardy rásimdeý jumystarymen aınalysyp jatyr. Memlekettik qoldaý baǵdarlamalaryna ázirge qatysyp úlgermegenimen, aldaǵy ýaqytta osy múmkindikterdi paıdalanyp, óndiris kólemin ulǵaıtýdy kózdeıdi. Josparynda ydys-aıaq pen kıim jýýǵa arnalǵan tabıǵı tazartqysh quraldar shyǵarý da bar.
Eske salsaq, buǵan deıin ShQO turǵyny qolónerdiń tórt baǵytyn qatar alyp júrgeni jaıly jazǵanbyz.