Otbasylardyń ál-aýqat deńgeıin anyqtaýdyń baldyq modeli engizilmek

ASTANA. KAZINFORM — Eńbek jáne halyqty áleýmettik qorǵaý mınıstrligi áleýmettik qoldaý sharalaryn taǵaıyndaý kezinde otbasylardyń ál-aýqat deńgeıin anyqtaýdyń baldyq modelin engizý týraly jarııalady. 

Qazaqstannyń eki oblysynda otbasylardyń ál-aýqat deńgeıin anyqtaýdyń baldyq úlgisin paıdalana otyryp, Eńbek mınıstrliginiń Biryńǵaı tsıfrlyq platformasy arqyly bilim berý, halyqty áleýmettik qorǵaý, turǵyn úı qatynastary jáne dene shynyqtyrý salalarynda birqatar memlekettik qyzmetterdi kórsetý boıynsha pılottyq joba júzege asyrylyp jatyr. Jańa tásil respýblıkalyq bıýdjetten áleýmettik tólemderdiń barlyq túrlerin saqtaı otyryp, jergilikti atqarýshy organdar tarapynan maqsatty qosymsha qoldaý sharalaryn qamtamasyz etýge múmkindik beredi. Osylaısha, shyn máninde muqtaj azamattarǵa kómek kórsetiledi.

Buryn habarlanǵandaı, alty memlekettik organnyń (QR ǴJBM, QR OM, QR TSM, QR ÓQM, QR TsDIAÓM jáne QR EHÁQM) 2020 jylǵy 22 mamyrda Shymkent qalasynda jáne Qaraǵandy oblysynda pılottyq jobany iske asyrý týraly birlesken buıryǵyna qol qoıyldy.

— Otbasylardyń ál-aýqat deńgeıin anyqtaýdyń baldyq modeli jergilikti bıýdjetter esebinen iske asyrylatyn qosymsha áleýmettik qoldaý sharalaryn taǵaıyndaý kezinde paıdalanylady, mysaly, mektepterde tamaqtandyrý, kolledjder men JOO stýdentterin jataqhanamen qamtý, sanatorııalyq-kýrorttyq emdeý, turǵyn úı kómegin kórsetý, — delingen habarlamada.

Otbasynyń ál-aýqat deńgeıi 23 áleýmettik-demografııalyq jáne ekonomıkalyq krıterııler boıynsha anyqtalatyn bolady. Qosymsha qoldaý sharalaryna ótinish bildirgen barlyq otbasylar 6 sanatqa jikteledi — asa qajettilikten (azyq-túlikke qarajattyń bolmaýy) joǵary ál-aýqatqa deıin (qarjylyq qıyndyqtar joq). Sheshim otbasynyń tsıfrlyq kartasy arqyly jınalǵan obektıvti derekter negizinde avtomatty túrde qabyldanady.

Kómek barlyǵyna birdeı emes, qajettiligine qaraı kórsetiledi. Materıaldyq kórsetkish retinde esepke alynady: tabys, múlik, kólik, nesıelerdiń bolýy; jáne materıaldyq emes (densaýlyq, múgedektik, bilim deńgeıi), sondaı-aq táýeldilik aýyrtpalyǵy jáne jasyryn tabystyń bolýy, mysaly, beıresmı jumys.

— 2 jáne odan da kóp turǵyn úı, 2 jáne odan da kóp kólik quraly, tirkelgen zańdy tulǵasy (JK, JShS) bar jáne bir otbasy múshesine shaqqandaǵy aılyq tabysy eń tómengi kúnkóris deńgeıiniń 4 deńgeıinen asatyn úı qojalyǵy — ál-aýqat deńgeıi joǵary 6-sanatqa jatqyzylady. Mundaı otbasylar jergilikti bıýdjetterden qarjylandyrylatyn qosymsha áleýmettik qoldaý sharalaryn alýshylardyń qatarynan shyǵarylady, — dep jazdy vedomstvodan.

1-5 sanatqa jatqyzylǵan otbasylardy qoldaý sharalaryn taǵaıyndaý avtomatty túrde júzege asyrylady.

Skorıngtik úlgini engizý respýblıkalyq bıýdjetten kepildendirilgen áleýmettik tólemderge (barlyǵy 41 túrine) áser etpeıtinin atap ótken jón. Bazalyq jáne yntymaqty zeınetaqylar, júktiligi jáne bala kútimi boıynsha 1,5 jasqa deıingi járdemaqylar, kópbalaly otbasylarǵa jáne marapattalǵan analarǵa beriletin járdemaqy, múgedektik boıynsha jáne múgedek bala kútimi boıynsha járdemaqylar, asyraýshysynan aıyrylý boıynsha járdemaqy, arnaýly memlekettik jáne basqa da járdemaqy túrleri ózgerissiz tólenetin bolady.

Sonymen qatar, ataýly áleýmettik kómek jáne mindetti áleýmettik saqtandyrý júıesine qatysýshylarǵa arnalǵan Memlekettik áleýmettik saqtandyrý qorynan tólenetin áleýmettik tólemderdiń 5 túri birdeı kólemde saqtalady.

Balldyq úlgini qoldaný naqty muqtaj azamattarǵa maqsatty túrde kómek kórsetýdi qamtamasyz etedi.

Eske sala keteıik, buǵan deıin keıbir kópbalaly otbasy qosymsha memlekettik qoldaýdan qaǵylatynyn jazǵan edik.