Otbasyda er azamat danalyqtyń ıesi bolýy kerek
ASTANA. KAZINFORM — Qazaqstanda ajyrasý máselesi qoǵamdaǵy ózekti problemalardyń birine aınalyp otyr. Mundaı jaǵdaıda erli-zaıyptylarǵa «shydaý kerek» dep keńes berýdiń shegi qandaı jáne otbasyn saqtaýdyń joly nede? Bul máselege ımam Nurlan Baıjigituly «BIZDIN ORTA» podkastynda pikir bildirdi.
Onyń aıtýynsha, qazaq qoǵamynda sabyr men shydamdylyqqa erekshe mán beriledi. Alaıda otbasyndaǵy zorlyq-zombylyqqa sheksiz shydaý durys emes.
— Qazaqta jer betindegi eń shydamdy halyq joq pa dep oılaımyn. Shydamdymyz biz. Biraq shydaýdyń da shegi bar. Basyna toqpaqtap, áńgir taıaq oınatsa, aqyl-esin ketirip, aqyrynda aýrý bolyp, múgedek bolyp qalǵan qanshama adam bar. Mundaı jaǵdaılardy estip júrmiz, al estimegenimiz odan kóp, — dedi Nurlan Baıjigituly.
Imamnyń sózinshe, keı jaǵdaıda er adamnyń keıin keshirim suraýy nemese ózgerýi otbasyndaǵy keleńsiz jaǵdaıdyń saldaryn joımaıdy.
— Er azamat túsinip, keshirim suraǵan kezde, bolmysy ózgerip, ómir ótip, jastyqtyń qyzýy basylǵannan keıin onyń paıdasy qandaı? Soǵysy bitkennen keıin qylyshpen ne shabasyz? Sondyqtan ár nárse óz ýaqytynda jasalýy kerek, — dedi ol.
Nurlan Baıjigituly otbasynyń saqtalýyna ózi de múddeli ekenin atap ótti. Alaıda keıbir jaǵdaıda otbasyndaǵy jaǵdaı shekten shyǵyp ketetinin aıtty.
— Men de januıanyń saqtalyp qalýyna múddelimin. Meniń sózderimde de januıany saqtaýǵa úndeımin. Biraq keıbir kezde jaǵdaı shekten shyǵyp ketedi. Keıbir oqıǵalardy, jaǵdaılardy bilemin. Mundaıda adamnyń ketip, óz ómirin saqtap qalýdan basqa múmkindigi bolmaıdy, — dedi ımam.
Onyń aıtýynsha, otbasy buzylǵan jaǵdaıda erli-zaıyptylar bir-birine qysym kórsetpeı, ásirese balalardy janjaldyń ortasyna qaldyrmaýy kerek. «Eger birge turý múmkin bolmasa, bir-birińdi qınamaı, eki jaqqa ketken durys. Balany da qınap, burynǵy jubaıyna qysym kórsetýge bolmaıdy.
Imam ár otbasynyń jaǵdaıy ártúrli ekenin aıtyp, mundaı máselege bir ǵana ólshemmen qaraýǵa bolmaıtynyn atap ótti.
— Bul jekeleı jaǵdaı. Ár adamnyń jaǵdaıy, taǵdyry ártúrli. Bárine birdeı baǵa bere almaımyz. Biraq kóp jaǵdaıda daý eki jaqtan bolǵanymen, er azamat danalyqtyń ıesi bolýy kerek. Jaǵdaı ýshyqqan kezde qatty ketpeı, sabyrmen sheshim qabyldaýy qajet, — dedi ol.
Sonymen qatar ol er adamnyń áıelge qol kóterýine ǵana emes, sózben qorlaýyna da jol bermeý kerektigin aıtty.
— Áıelge qol kóterýge bolmaıdy. Qol kótermek túgili, tilmen de jábirleýge bolmaıdy. Keıbir azamattar bar, qol kótermeıdi, biraq sózben janyn jep, adamdy ishten múgedek qylatyn jaǵdaıǵa jetkizedi. Onyń sońy nege aparatynyn aıtpaı-aq qoıaıyn, eldiń ishinde belgili bolyp jatyr. Qalaı bolǵanda da shegi bolýy kerek, — dedi ımam.
Onyń pikirinshe, er adam otbasyndaǵy usaq-túıek máselelerge baılanyp qalmaı, bala-shaǵasynyń jáne áýletiniń bolashaǵyna mán berýi qajet.
— Er azamat degende azamat bolyp, tulǵa bolý kerek. Balalardyń óskenin oılaý kerek, úlken maqsat qoıý kerek. Mysaly, memleketke, ultqa qyzmet etý degen uly maqsat qoısańyz, dál sol sııaqty «men adam bolamyn, osy áýlettiń urpaǵyn kóbeıtemin, urpaǵym arqyly ultymyzdyń bolashaǵyna bir jaqsy nárse jasaımyn» deseńiz, túzý kóńilmen júrip, qısyq nárselerge mán bermeı ótip kete beresiz, — der túıindedi Nurlan Baıjigituly.
Buǵan deıin ajyrasý balanyń psıhıkasyna qalaı áser etedi jáne ony qalaı jeńildetýge bolatynyn jazǵanbyz.
