«Otbasy – mektep – memleket» úshtigi úılesimdi bolsa, jaqsy nátıjege jetýge bolady – Prezıdent

ASTANA. KAZINFORM – Urpaq tárbıesinde ata-ana, muǵalim jáne memlekettik organdar birge jumys isteýge tıis. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

– Halqymyz «Tárbıe tal besikten bastalady» dep beker aıtpaǵan. Urpaq tárbıesinde ata-ana, muǵalim jáne memlekettik organdar birge jumys isteýge tıis. Sebebi, jaýapkershilik bárine – ortaq. Hakim Abaı da «Adamnyń adamshylyǵy aqyl, ǵylym, jaqsy ata, jaqsy ana, jaqsy qurby, jaqsy ustazdan bolady» dep aıtqan. «Otbasy – mektep – memleket» úshtigi úılesimdi bolsa, jaqsy nátıjege jetýge bolady. Al bul úshtiktiń ózeginde – eńbekqorlyq ıdeıasy bolýǵa tıis. Jas urpaqqa eńbeksiz eshqandaı ıgilik bolmaıtynyn únemi túsindirip aıtý kerek, - dedi Qasym-Jomart Toqaev. 

Memleket basshysy qoǵamda masyldyqqa jol bermeý qajettigin basa aıtty.

– Sebebi, bul jol tek tyǵyryqqa tireıdi. «Taza Qazaqstan» jalpyulttyq aktsııasy – osy baǵyttaǵy naqty sharanyń biri. Men buǵan deıin de aıttym. Taza Qazaqstan degenimiz – qorshaǵan ortany taza ustaý ǵana emes. Árıne, ol da mańyzdy. Sonymen birge bul – oı-sana tazalyǵy degen sóz. Jan-dúnıesi taza adam qaıyrymdy, meıirimdi bolady. Qoly taza adam jemqorlyqqa barmaıdy, adal bolady. Asyl qasıetterdi boıyna sińirgen naǵyz adal azamattar Ádiletti Qazaqstannyń tiregi bolatyny sózsiz, - dedi Prezıdent.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr. 

Degenmen ustazdyń nazary bala oqytý isinde bolýǵa tıis.