Otbasy kúni: Óskemendik erli-zaıypty adam ómirin qutqaryp júr

Óskemen qalasynyń № 9 órt sóndirý bóliminiń bastyǵy Ǵamzat Bekbosynov óz mamandyǵyn júrek qalaýymen tańdaǵan. Onyń jubaıy Farıda da TJ júıesinde — qalalyq № 4 órt sóndirý bóliminiń radıotelefonshysy bolyp qyzmet atqarady.

Erli-zaıyptylar bir-biriniń qıyndyǵyn, mazasyzdyǵyn, jumystaǵy aýyrtpalyqty jáne túngi kezekshiliktiń ne ekenin jaqsy túsinedi.

Ǵamzat 15 jyldan astam ýaqyt boıy azamattardyń qaýipsizdigin qamtamasyz etip keledi. Ol talaı tótenshe jaǵdaılarda jedel áreket etip, órtterdi sóndirýge qatysty.

— Qyzyl jalynǵa oranǵan páterge talaı ret kirdik. Nazarbaev dańǵylyndaǵy úıde shyqqan órt áli esimde. Áriptesim ekeýimiz turǵyndardy tútin tumshalaǵan podezden syrtqa alyp shyqtyq, — deıdi Ǵamzat.

Farıdanyń da qyzmette júrgenine az ýaqyt bolǵan joq. Tájirıbeli radıotelefonshy retinde ol órtti sóndirý kezinde mańyzdy ról atqarady.

— Men TJM júıesinde 10 jyldan astam ýaqyt qyzmet etip kelemin. Meniń tájirıbemdegi eń iri órtterdiń biri — armatýra zaýytyndaǵy órt boldy. Jumys kúnim telefon qońyraýlaryna jaýap berýmen ǵana shektelmeıdi. Bul joǵary jaýapkershilikti talap etetin jumys. 30-40 sekýnd ishinde dıspetcher dúrbeleńge túsken adamdy tynyshtandyryp, naqty mekenjaıyn bilip, ne janyp jatqanyn anyqtap, órttiń deńgeıin baǵalap, qansha órt sóndirý avtotsısternasyn jiberý kerektigin jáne qosymsha kúsh qajet pe ekenin birden sheshýi kerek, — deıdi Farıda.

Bekbosynovtar otbasynda eki bala bar. Erli-zaıyptylardyń kezekshilik kesteleri sırek sáıkes keledi. Sondyqtan birge ótkizetin demalys pen otbasylyq merekeler olar úshin naǵyz syılyqqa aınalady.

— Barlyq qıyndyqqa qaramastan, TJM júıesinde birge qyzmet etip júrgen erli-zaıyptylar vedomstvonyń berik irgetasy. Tájirıbe men qyzmetke degen adaldyq osyndaı otbasylarda urpaqtan-urpaqqa berilip jatady, — dep habarlady ShQO TJD baspasóz qyzmetinen.

Eske salsaq, osyǵan deıin qazaqstandyq otbasylar qandaı memlekettik qoldaýdy kóbirek qajet etetinin jazǵanbyz.