Otbasy kúni: Aýylǵa qaraǵanda qalada nekelesý deńgeıi joǵary
ASTANA. KAZINFORM — Búgin Qazaqstanda Otbasy kúni atalyp ótedi. Qazaq qoǵamy úshin otbasy ınstıtýty qashanda qundy, mańyzdy. Degenmen, álemniń kóptegen eli sekildi Qazaqstanda da otbasyn keshirek qurý úrdisi baıqalady. Bul týraly Ekonomıkalyq zertteýler ınstıtýty Óńirlerdi zertteý jáne ómir sapasy ortalyǵy dırektorynyń orynbasary Áıgerim Amanjolova pikir bildirdi.
Sarapshynyń aıtýynsha, jastar nekege turmas buryn bilim alyp, kásibı turǵyda qalyptasyp, qarjylaı táýelsiz bolýǵa kóbirek mán beredi.
— Byltyr alǵash neke qıǵandardyń ortasha jasy erler arasynda 27,9 bolsa, áıelder arasynda — 25,3 jas bolyp otyr. Salystyra ketsek, 2014 jyly bul kórsetkish 27,1 jáne 24,6 jas bolǵan. Eldegi jalpy nekelesý koeffıtsıenti 1000 adamǵa shaqqanda 5,69 paıyz. Eń joǵary kórsetkish Astanada (6,75), Qaraǵandy oblysynda (6,32), Shyǵys Qazaqstan oblysynda (6,27) jáne Almaty oblysynda (6,18) deńgeıinde tirkeldi, — deıdi Áıgerim Amanjolova.
Al eń tómen kórsetkish Qyzylorda (5,06), Batys Qazaqstan (5,10) jáne Atyraý oblystarynda (5,17) tirkeldi. Óńirler arasynda aıtarlyqtaı aıyrmashylyq baıqalmaıdy, bul elimizdiń barlyq óńirinde otbasy qundylyǵy joǵary ekenin kórsetedi.
— Taǵy bir erekshelik — qalada nekelesý deńgeıi joǵary. 2025 jyly qala turǵyndary arasyndaǵy nekelesý koeffıtsıenti 6,09 bolsa, aýyldyq jerlerde bul kórsetkish — 4,98 bolǵan, — dedi zertteýshi.
Qazaq qoǵamynda otbasynyń róli joǵary ekenin 2025 jyly Ekonomıkalyq zertteýler ınstıtýty júrgizgen áleýmettik zertteý de rastady. Saýalnamaǵa qatysqandardyń 97,4%-y týystary jáne dostarymen aralasyp turatynyn aıtsa, 89,5%-y qıyn jaǵdaıǵa tap bolǵanda arqa súıeıtin jaqyn adamy bar ekenin atap ótken.
— Mundaı nátıje elimizde otbasy, týystar arasyndaǵy qarym-qatynas qoǵamnyń birligin nyǵaıtýda, áleýmettik turaqtylyqty qamtamasyz etýde mańyzdy ekenin dáleldeıdi, — dedi Áıgerim Amanjolova.
Aıta keteıik, Ulttyq statıstıka bıýrosynyń málimetinshe, 2025 jyly elimizde 116 myń neke tirkelgen.
Sondaı-aq Qazaqstanda «Mereıli otbasy» ulttyq konkýrsy bastaldy.
