«Otbasy kapıtaly»: Depýtat ár tórtinshi balaǵa 5 myń dollar tóleýdi usyndy

Májilis depýtaty Gaýhar Tanasheva Premer-Mınıstr Álıhan Smaıylovqa joldaǵan saýalynda eldegi demografııalyq ahýaldy «Otbasy kapıtaly» baǵdarlamasy arqyly jaqsartýdy usyndy, dep habarlaıdy Kazinform.

«Elimizde 550 myń kópbalaly jáne erekshe bala tárbıelep otyrǵan 107 myń otbasy bar. Olardyń jartysynan kóbi baspanasyz.

Birinshisi, densaýlyǵyna qosymsha qarajat qajet, ekinshisi, turǵyn úı-turmystyq jaǵdaıyn jasaýymyz kerek. Bizde qanshama analar balalaryn jetektep ne úı ala almaı, ne bala emine aqsha tappaı júr.

Qazirgi bizdiń elimizde bolyp jatqan máselelerdiń barlyǵy osy joqshylyqtyń kesirinen. Qanshama ata-analar osylaı tabys tabý úshin birneshe jumysta istep balalaryn úıde qaraýsyz qaldyrýǵa májbúr», - dedi depýtat.

Sondaı-aq, ol 32 jylda Qazaqstan halqynyń sany 4 mıllıonǵa ǵana óskenin problema ótip kóterdi.

«Qazaqstan Halyq partııasy fraktsııasynyń depýtattary otbasynda tórtinshi bala týǵanda nemese otbasyda erekshe bala bolsa, 5 000 AQSh dollary, ıaǵnı 2 mln 300 myń teńge mólsherinde «Otbasylyq kapıtal» baǵdarlamasyn iske qosýdy usynady.

Bul kapıtal úsh baǵytta jumsalýy josparlanady. Birinshi, úısiz júrgen otbasylarymyz baspanaly bolý múmkindigi paıda bolady. Ekinshisi, bilim ala almaı júrgen kópbalaly otbasynan shyqqan balalardyń armany oryndalady. Úshinshiden, bul qarajatty otbasylar balalarynyń densaýlyǵyn jaqsartýǵa qoldana alady.

«Otbasylyq kapıtal» sııaqty memlekettik qoldaýdyń mundaı júıesin engizý elimizde halyq sanyn aıtarlyqtaı arttyrady jáne qıyn jaǵdaıǵa tap bolǵan otbasylarǵa qaı jaǵynan bolsa da naqty kómek bolady», - dedi Gaýhar Tanasheva.