Otbasy bankten úı áperem dep aldaǵan alaıaq 55 mln teńgeni qaltasyna basqan

ASTANA. KAZINFORM — Astanada ıpotekalyq nesıeleý salasyndaǵy alaıaqtyq áshkere boldy. 

Qala turǵyny ózin bank qyzmetkerimin dep tanystyryp, «Otbasy bank» AQ arqyly bastapqy jarnasyz ıpotekalyq turǵyn úı satyp alýǵa kómektese alatynyn aıtyp aqparat taratqan.

Mysaly, tanysyna bankten aýktsıonda satylatyn tyıym salynǵan úsh bólmeli páterdi ıpotekaǵa satyp alýdy usynǵan.

Aýktsıonǵa qatysý úshin 630 myń teńge suraǵan.

Biraz ýaqyttan keıin ıpoteka rásimdeý úshin shot ashyp, 11 mln teńge kóleminde aqsha salý qajettigin habarlaǵan.

Osyǵan uqsas syltaýlarmen tanysyn aldap, senimin teris paıdalana otyryp, jalpy somasy 14 mln teńgeden astam aqshany alaıaqtyq jolmen ıemdengen.

Onyń qylmysynan 22 jábirlenýshige 55 mln teńgeden astam materıaldyq shyǵyn keldi. 

Kináli tulǵa 3 jylǵa bas bostandyǵynan aıyryldy.

Jábirlenýshilerdiń azamattyq talap aryzdary qanaǵattandyryldy.

Sot úkimi zańdy kúshine engen joq.

Prokýratýra alaıaqtyq jasaǵandardyń múlki tárkilenip, 10 jylǵa deıin qylmystyq jaýapkershilik qarastyrylǵanyn eskertedi.