«Otbasy banktegi» jemqorlyq: Qyzmetkerler zańsyz aqsha alyp, jalǵan qujat jasaǵan
ASTANA. KAZINFORM — 2025 jyly «Otbasy bank» qyzmetkerleri arasynda jemqorlyqqa qatysty birneshe zańbuzýshylyq anyqtaldy.
— Ótken jyly Bank qyzmetkerleriniń sybaılas jemqorlyq sıpatyndaǵy birqatar áreketi belgili boldy. Olar klıentterge, rıeltorlarǵa, jeke sot oryndaýshylary men notarıýstarǵa belgili bir máselelerdi sheshýge kómekteskeni, sondaı-aq turǵyn úı kezegin jyljytqany úshin zańsyz syıaqy alǵan, — delingen banktiń esebinde.
Sonymen qatar fılıaldardyń birinde qyzmetker klıentterdiń nesıe tóleý qabiletin rastaý úshin olardyń tabysy týraly jalǵan qujattar daıyndap, nesıe ótinimderine qosa bergeni de belgili bolǵan.
Anyqtalǵan faktilerden keıin atalǵan qyzmetkerler jumystan shyǵarylǵan.
Bank sondaı-aq bul qyzmetkerlerdi qylmystyq jaýapkershilikke tartý týraly quqyq qorǵaý organdaryna aryz joldaǵan.
Qazir anyqtalǵan derekter boıynsha birneshe qylmystyq is aıasynda sotqa deıingi tergeý júrip jatyr.
Aıta keteıik, buǵan deıin Qostanaı oblysynda Sim-Box arqyly alaıaqtarǵa kómektesken jigit sottalǵany habarlandy.
