«Otbasy bankten» basqalarǵa da turǵyn úı jınaq júıesine qatysýǵa múmkindik berý kerek — depýtat saýaly

ASTANA. KAZINFORM — Májilis depýtaty Erbolat Satybaldın Premer-mınıstrdiń orynbasary Ermek Kósherbaevqa saýal joldap, Qazaqstannyń ıpoteka naryǵyna jańa tásil engizýdi usyndy.

— Turǵyn úı — adamnyń basty konstıtýtsııalyq quqyǵy. Alaıda is júzinde bul quqyqty júzege asyrý qıynǵa soǵyp otyr. Máselen, shamamen 30 mln teńge turatyn avtokólikti satyp alý áldeqaıda jeńil — jyldyq mólsherleme — 6%, bastapqy jarna talap etilmeıdi, qujat rásimdeý jyldam. Al dál osy somaǵa baspana alǵysy kelgen azamat kemi 30% bastapqy jarna tóleýge májbúr. 18–20% kólemindegi joǵary paıyzben kelisýge tıis. Kúrdeli qujat jınaý protsesinen ótip, sońynda ıpoteka bermeı qalýy múmkin, — dep bastady ol saýalyn.

Depýtat eldiń ıpoteka naryǵyna Rent-to-Buy júıesin (jaldaýdan — satyp alýǵa) engizýdi usyndy.

— Mysaly, aıyna 200 myń teńge tólese, sonyń 50 myń teńgesi aldaǵy ýaqytta úıdi satyp alǵanda alǵashqy jarna retinde sanalady. Osylaısha adam úsh jyl ishinde úıge aqsha jınap qana qoımaı, tólem qabiletin de dáleldep úlgeredi. Bul júıe bizdegi jastarǵa, jalǵyzbasty analarǵa, áleýmettik osal azamattarǵa óte qolaıly bolar edi, — dedi Erbolat Satybaldın.

Sondaı-aq, ol halyqtyń baspanaǵa qol jetkizý múmkindikterin keńeıtý úshin tek «Otbasy bankpen» shektelmeı, basqa bankterge de turǵyn úı jınaq júıesine qatysýǵa múmkindik berý qajet degen pikir aıtty.

Sonymen qatar, búgin taǵy bir Májilis depýtaty Asylbek Nuralın Astanada jumys kúni bastalatyn ýaqytty saǵat 9-dan 7-ge aýystyrýdy usyndy.