Otbasy bankke ıslamdyq bank operatsııalaryn júrgizýge ruqsat berilýi múmkin
ASTANA. KAZINFORM — Májilis qarjy naryǵyn damytý jáne tsıfrlandyrý máselelerine qatysty zań jobalaryn ekinshi oqylymda maquldady.
«Reıtıngtik qyzmet týraly» zań jobasy boıynsha Qarjy jáne bıýdjet komıtetiniń tóraıymy Tatıana Saveleva baıandama jasady.
Onyń aıtýynsha, zań jobalary qarjy naryǵyn odan ári damytý maqsatynda ázirlengen. Birinshi oqylym barysynda qujattyń negizgi tujyrymdamalary qoldaý tapqan.
— Depýtattar ekinshi oqylymǵa daıyndyq kezinde birqatar túzetý engizdi, — dedi Tatıana Saveleva.
Atap aıtqanda, túzetýlerdiń alǵashqy blogy reıtıngtik qyzmetti jetildirýge baǵyttalǵan. Soǵan sáıkes, reıtıng agenttikteri beretin reıtıngterdi alý erikti túrde júzege asyrylady.
Ekinshi blok Qazaqstan reıtıng agenttiginiń táýelsizdigin kúsheıtýge arnalǵan. Atap aıtqanda, reıtıng ádisnamasyn ázirleıtin komıtettiń quramyn aıqyndaý máselesi qamtylǵan.
Sonymen qatar azamattardyń quqyqtaryn qorǵaý jáne qarjy qyzmetteriniń qoljetimdiligin keńeıtý maqsatynda Otbasy bankke ıslamdyq bank operatsııalaryn júrgizý quqyǵyn berý usynylǵan.
Budan bólek, zańdy tulǵalardyń nesıeleri boıynsha jeke tulǵalardyń kepildigin paıdalaný talaptary naqtylanǵan.
Zań jobasynda tólem qyzmetteri naryǵyn damytýǵa qatysty ózgerister de qarastyrylǵan. Atap aıtqanda, birinshi sanattaǵy tólem uıymdary engiziledi. Olarǵa zańdy tulǵalarǵa bank shottaryn ashýǵa jáne aqsha aýdarý operatsııalaryn júrgizýge múmkindik beriledi.
— Bul túzetýler qarjy qyzmetteriniń qunyn tómendetip, naryqtaǵy básekeni kúsheıtýge yqpal etedi, — dedi depýtat.
Sonymen birge zań jobasy aıasynda tsıfrlyq teńgeni respýblıkalyq jáne jergilikti bıýdjetterdi, sondaı-aq memlekettik qorlardyń bıýdjetterin oryndaý kezinde paıdalaný múmkindigi keńeıtilgen.
Tatıana Savelevanyń aıtýynsha, zań jobalarynyń tujyrymdamasy naqtylanyp, keńeıtilgendikten, negizgi jáne ilespe zań jobalarynyń ataýyna da ózgeris engizilgen.
Aıta keteıik, buǵan deıin Qazaqstanda jasandy ıntellekt pen tsıfrlandyrýdy damytýǵa 177 mlrd teńge bólingeni habarlanǵan edi.
