Otbasy bank jumysshylardy baspanamen qamtýdyń úsh jolyn usyndy

ASTANA. KAZINFORM - Otbasy bankinde jumysshylardy áleýmettik qoldaýdyń tıimdi quraly bar. Ol — «Korporatıvti ónim».

Atalmysh baǵdarlama aıasynda jumys berýshi men Otbasy bankiniń qoldaýymen 1000-ǵa jýyq adam qonys toıyn atap ótti, olardyń qatarynda — zaýyt jumysshylary, energetıkter, kenshiler, metallýrgter, munaıshylar men dárigerler bar.

Bank pen kompanııalar qoljetimdi zaemdarǵa 5,6 mlrd teńgeden astam qarjy bóldi. Qazaqstandyqtardy turǵyn úımen qamtamasyz etý áleýmettik máselesin — memlekettik bıýdjetten qarajat tartpaı, memlekettik baǵdarlamalardaǵy konkýrstardy uzaq kútpeı-aq sheshýge bolatyny mańyzdy.

Korporatıvtik ónim — Aqtaý, Atyraý, Aqtóbe, Qaraǵandy, Qostanaı, Aqsý, Almaty, Astana, Shymkent, Pavlodar, Ekibastuz, Hromtaý, Lısakov, Rýdnyı, Petropavl qalalaryndaǵy túrli kompanııalardyń qyzmetkerlerine turǵyn úı máselesin sheshýge kómektesti.

— Eńbek adamdarynyń turǵyn úı máselesin sheshýde qoldaý kórsetý — biz úshin óte mańyzdy. Óıtkeni, kásiporyn qyzmetkerleri kóp jaǵdaıda qajetti bastapqy jarnanyń bolmaýy men jalaqylarynyń jetkiliksizdiginen memlekettik baǵdarlamalar men turǵyn úı qurylys jınaq júıesine qatysa almaıdy. Dál osy jerde jumys berýshileri sheshýshi ról atqara alady. «Korporatıvtik ónimdi» paıdalana otyryp, olar óz qyzmetkerleriniń turǵyn úı máselesin sheshe alady. Bul qyzmetkerlerdiń áleýmettik ál-aýqatyna ınvestıtsııa quıý ǵana emes. Sondaı-aq, bul kadrlardyń adaldyǵyn nyǵaıtady, kúshti jáne yntaly komanda qurady, kóptegen jaǵdaılarda eldegi ishki kóshi-qonnyń aldyn alady, sırek jáne qundy kadrlardy saqtaıdy. Bıýdjetten áleýmettik júktemeni azaıtý, óńirlerde jumys isteıtin jastardy ustap qalý úshin biz iri kásiporyndarǵa jyl saıyn «Korporatıvtik ónim» sheńberinde Otbasy bankimen yntymaqtastyq múmkindigin qarastyrýdy usynamyz, — dep túsindirdi Otbasy bankiniń Basqarma tóraǵasy Lázzat Ibragımova.

Otbasy bankindegi «Korporatıvtik ónim» 2019 jyly paıda boldy. Onyń kómegimen jeke baspanalaryn «Qarajanbasmunaı» kompanııalarynyń qyzmetkerleri, Eurasian Resources Group (ERG) kompanııalar toby, atap aıtqanda «Shubarkól kómir», «Eýroazııalyq energetıkalyq korporatsııa» AQ, «Sokolov-Sarybaı taý-ken baıytý óndiristik birlestigi» AQ, «Qazhrom „TUK“ AQ, „Qazaqstan alıýmınııi“ AQ, Qaraǵandy oblysynyń kenshileri men metallýrgteri, sondaı-aq medıtsınalyq jáne qurylys kompanııalarynyń qyzmetkerleri satyp aldy.

Ónim árbir jumys berýshige jasalatyn ıkemdi sharttarmen yńǵaıly. Sondyqtan kompanııa nemese kásiporyn qalaýlary boıynsha ózderine sáıkes keletin jeke nusqa qura alady.

Jumys berýshige óz qyzmetkerleriniń turǵyn úı máselesin qalaı sheshýge bolady?

Úsh negizgi yntymaqtastyq múmkindigi bar.

1. Kompanııa nemese kásiporyn bankke nesıe nemese oblıgatsııalyq qaryz túrinde mólsherlemesi 0,01% boıynsha aqsha bóledi. Qarajtty tartý merzimi — 8 jylǵa deıin. Osy aqshaǵa Otbasy bank kásiporyn qyzmetkerlerine 5% (JTSM 5,2%-dan bastap 5,3%-ǵa deıin) mólsherlemesi boıynsha zaem beredi. Bul rette bastapqy jarnanyń mólsheri qaryz somasynyń 0-10% quraıtyny mańyzdy. Qaryz alýshyǵa nesıe berý merzimi — 19 jylǵa deıin. Zaem bastapqy jáne qaıtalama naryqtardan quny 50 mln teńgege deıin turǵyn úı satyp alýǵa múmkindik beredi.

Jeńildetilgen sharttar boıynsha nesıeleýge qatysýshylardyń tizimin jumys berýshi usynady. Yntymaqtastyqtyń bul nusqasynyń basty artyqshylyǵy — jumys berýshi óz qyzmetkerlerin nesıelendirý úshin bankke bólgen qarajatyn 100% qaıtara alýy. Aqsha qyzmetkerdiń tólem tártibine qaramastan, sondaı-aq qyzmetkerdiń osy kompanııadan ketkenine nemese onda jumysyn jalǵastyrǵanyna qaramastan kompanııaǵa qaıtarylady.

Jalpy, ártúrli kompanııalardyń 210-nan astam qyzmetkeri osylaısha ózderiniń turǵyn úı máselesin sheshti. Dál osy nusqa boıynsha «Qarajanbasmunaı» AQ 2019 jyly Otbasy bankimen yntymaqtastyqta boldy. Olar «Korporatıvtik ónim» aıasyndaǵy alǵashqy seriktes kompanııa boldy. Nátıjesinde qonys toıyn kásiporynnyń 100-ge jýyq qyzmetkeri atap ótti.

2. Ózara árekettesýdiń ekinshi nusqasy — bul uıym nesıe túrinde (qaıtarylatyn nemese qaıtarylmaıtyn) óz qyzmetkerlerine aralyq zaem alý úshin bastapqy jarnaǵa qarajat beredi. Bul rette qaryz alýshy úshin baǵalaý kórsetkishiniń eń tómengi máni boıynsha qoıylatyn talap joq ekendigin atap ótken mańyzdy. Ol nólge teń bolýy múmkin. ıAǵnı, jumys berýshi óz qyzmetkerine qaryz somasynyń 50% mólsherinde depozıtti tolyqtyrady jáne oǵan birden kredıt beriledi. Bul jaǵdaıda qaryz boıynsha mólsherleme jyldyq 7% bastap (JTSM-7,3%-dan 9,1% deıin) 8,5% (JTSM 9%-dan 9,6% deıin) quraıdy. Nesıeleý merzimi — 25 jylǵa deıin.

Osy nusqa boıynsha «BK-STROI» qurylys kompanııasy óz qyzmetkerlerin qoldap, olarǵa bastapqy jarnanyń bir bóligin tóledi. Osy yntymaqtastyq tetigi aıasynda ár túrli uıymdardyń 11-den astam jumysshylar otbasy jeke baspanalaryn satyp aldy.

3. Otbasy bankimen yntymaqtastyqtyń úshinshi nusqasy — seriktester arasynda eń ońtaıly jáne suranysqa ıe. Bul satyp alý arqyly jalǵa alý. Munda kásiporyn óz qyzmetkerlerine daıyn turǵyn úı usynady. Qyzmetker páterge kirip, qonys toıyn atap ótedi, nomınaldy jaldaý aqysyn tóleıdi jáne Otbasy bankindegi depozıtke bastapqy jarna jınaıdy. Qajetti 50% mólsherindegi soma jınaq shotyna jınalǵan kezde bank qalǵan 50%-ǵa jyldyq 3,5%-dan (JTSM 3,6%-dan 4,4%-ǵa deıin) jyldyq 5%-ǵa (JTSM 5,1%-dan 6,9%-ǵa deıin) deıingi mólsherlemeler boıynsha turǵyn úı zaemyn beredi.

Dál osy nusqa boıynsha Eurasian Resources Group (ERG) Otbasy bankimen óte belsendi yntymaqtastyq ornatty. Osy kompanııalar tobynyń 620-dan astam qyzmetkeri óz páterlerinde tura otyryp, baspanalaryn bolashaqta satyp alý úshin qarajat jınaýda. Sondaı-aq, Otbasy bank osy nusqamen «Alageum Electric» kompanııalar tobyna kiretin «Petropavl elektrotehnıkalyq zaýyty» JShS-men yntymaqtasady.

Otbasy bankimen yntymaqtastyq ornatý úshin kompanııalar men kásiporyndardyń ókilderi óz óńirinde tikeleı bank fılıalynyń dırektorlaryna júgine alady (https://hcsbk.kz/ru/reception-of-citizens/).

Korporatıvtik ónim jumysynyń sátti keısteriniń biri — 2024 jyly Shyǵys Qazaqstan oblysynda iske asyryldy. Onda «Shyǵys mamany» jobasy iske qosyldy. Ol mamandarǵa turǵyn úı máselesin sheship qana qoımaı, sonymen qatar tar beıindi mamandardy kóshýge, jylý energetıkasy salasynda suranysqa ıe kadrlardyń ketýin boldyrmaýǵa kómektesti. Bul aımaqtaǵy óte tapshy jáne suranysqa ıe mamandyq. Kadrlarmen máseleni sheshý úshin oblys ákimdigi jeńildetilgen nesıeleý úshin 300 mln teńge bóldi, Otbasy bank qaryz berýge kómektesti. Búgingi tańda 17 maman qonys toıyn atap ótti. Olar 10% bastapqy jarna jáne 5% nesıe mólsherlemesimen (JTSM 5,2%-dan 5,7%-ǵa deıin) turǵyn úı satyp ala aldy.

— Korporatıvtik ónim qaǵıdattaryn tıimdi paıdalanýdyń taǵy bir aıqyn mysaly — Qaraǵandy kenshilerin qoldaý. Olardyń otbasylaryn baspanamen qamtamasyz etý óte mańyzdy ekenin bárimiz bilemiz. Óıtkeni, bul erteńgi kúnge degen senimdik, jaqyndaryńyz úshin tynyshtyq. Sondyqtan, Otbasy bank Qaraǵandy oblysynyń ákimdigimen birlesip, 2022 jyly jáne 2023 jyldyń birinshi jartyjyldyǵynda qoljetimdi sharttar boıynsha jergilikti kenshiler men metallýrgterge nesıe berdi. Jalpy 3,2 mlrd teńge bólinip, 229 otbasy baspana satyp aldy. Olardyń barlyǵy «Qarmet» AQ kompanııasynyń qyzmetkerleri, burynǵy — «Arselor Mıttal Temirtaý» kompanııasy bolǵan. Jalpy kásiporynnyń ózi qyzmetkerlerin qoldap, nesıe berý úshin qarajat bóledi dep josparlanǵan bolatyn. Biz bul máseleniń sheshimin kútýdemiz, — dep atap ótti Otbasy bankiniń Basqarma tóraǵasy Lázzat Ibragımova.

Bıylǵy jyly elimizdiń taǵy bir iri kásiporny — «Bogatyr Kómir» JShS-niń júzdegen qyzmetkerleri qonys toıyn toılaı alady — dep senedi Otbasy bank. Sebebi ótken jyly bank elimizdiń kómir ónerkásibiniń kóshbasshy kompanııasymen yntymaqtastyq týraly kelisim jasaǵan. Qazir bank qyzmetkerlerdi nesıeleý úshin qarajattyń aýdarylýyn kútýde.

Sondaı-aq, quramynda fosfor bar ónim óndiretin jetekshi kompanııa «Qazfosfat» JShS-men yntymaqtastyq ornatylǵan, bankke qarajat túskennen keıin, joba júzege asyrylmaq.

Jumysshylar óz betterimen alǵashqy jarnaǵa qarajat jınaýdy bastap, turǵyn úı satyp alý jolyn qysqarta alady. Jınaqtaý mádenıeti — klıentterge bank ıpotekasyn eń qoljetimdi baǵamen alýǵa múmkindik beredi. Kompanııa qyzmetkerleri umytpaı, turaqty túrde jarna jasap otyrýlary úshin «Armanǵa jol» dep atalatyn kómekshi qural bar. Ol júzdegen kompanııalarǵa Otbasy bankindegi depozıtke jalaqy túsken kúni qarajatty avtomatty túrde aýdaryp otyrýǵa kómektesedi.

Aıta keteıik, búgin Úkimet otyrysynda jumysshy kadrlarǵa arnalǵan ıpotekalyq baǵdarlama iske qosý tapsyryldy.