Otbasy bank: «Umaı» jáne «Jasyl ıpoteka» baǵdarlamalary iske qosylady
ASTANA. KAZINFORM – Bıyl basynda páteri bar adamdarǵa yńǵaıly «Umaı» jáne «Jasyl ıpoteka» baǵdarlamalary iske qosylady. Bul týraly Kazinform agenttiginiń saýalyna Otbasy banktiń resmı jaýabynda aıtylǵan.
— 2025 jyly Otbasy bank «Umaı» jáne «Jasyl ıpoteka» baǵdarlamalaryn iske qosýdy josparlap otyr. Bul baǵdarlamalarǵa qatysý úshin 20%-dan bastalatyn eń tómengi bastapqy jarna bolýy kerek. Sondaı-aq osy baǵdarlamalar boıynsha zaemnyń eń kóp somasy 50 mln teńgege teń. Nesıeni úı satyp alýǵa nemese jóndeý jumystary úshin alýǵa bolady. Turǵyn úıdiń bolýyna eshqandaı shekteý joq. Bank ótinimderdi qabyldaý kúnin qosymsha habarlaıdy, - delingen habarlamada.
Jasyl ıpoteka – bul «jasyl standartqa» sáıkes keletin nysannan turǵyn úı satyp alýǵa beriletin bank zaemy. ıAǵnı nysannyń ulttyq «Ómir» standarty, reseılik memlekettik standarty jáne halyqaralyq BREAM nemese LEED standarttaryna sáıkestik sertıfıkaty bolýy kerek.
Nesıe 6 aıdan 25 jylǵa deıin beriledi. Bastapqy jarna – sharttyq somanyń 20%-ynan 50%-yna deıin.
Al «Umaı» – áıelderge arnalǵan ıpoteka baǵdarlamasy. Onyń sharttary tıimdi bolýyna (bastapqy jarna - 15%) baılanysty úlken suranysqa ıe. Mysaly, byltyr mamyr aıynda osy baǵdarlama boıynsha ótinim qabyldaý bastalyp, jarty kúnge jetpeı qarjysy taýsylyp qalǵan bolatyn.
Aıta keteıik, buǵan deıin aldaǵy aılarda «Naýryz» baǵdarlamasynyń ekinshi kezeńi iske qosylatynyn jazǵan edik.
Al «Otbasy bank» AQ basqarma tóraıymy Lázzat Ibragımova «Naýryz» baǵdarlamasyna 2025 jyly 300 mlrd teńge bólý josparlanǵanyn aıtqan bolatyn.