Otbasy bank shildede alǵashqy oblıgatsııalaryn shyǵarady
KAZINFORM - Otbasy bank bıyl óz oblıgatsııalaryn shyǵarý jáne ornalastyrý arqyly 300 mlrd teńge tartýdy josparlap otyr. Bul aqsha qazaqstandyqtarǵa «Naýryz» baǵdarlamasy boıynsha kredıt berýge jumsalady.
Shilde aıynda 100 mlrd kólemindegi alǵashqy oblıgatsııalar shyǵarylyp, «Qazaqstan qor bırjasyna» ornalastyrylady. Bir oblıgatsııanyń nomınaldy quny 1000 teńgeni quraıdy. Bul rette qarajat tartylatyn mólsherleme tek alǵashqy saýda-sattyq qorytyndylary boıynsha aıqyndalady.
KASE alańynda ótkiziletin Otbasy bank emıtenti kúninde Basqarma Tóraıymy Lıazzat Ibragımova oblıgatsııalar ne úshin shyǵarylatynyn túsindirdi.
«Jıyrma jyl buryn qurylǵan bank mıssııasy – otbasylardyń baspanaly bolýyn qamtamasyz etip, olardyń ál-aýqatyn jaqsartý. Otbasy bank senimdi jáne turaqty damyp kele jatqan jınaqtaý jáne qarjylandyrý júıesi bolyp esepteledi. Qazaqstandaǵy ekinshi deńgeıdegi bankter arasynda ıpoteka boıynsha Otbasy banktiń úlesi 54 paıyzdy quraıdy. Qazir Otbasy bank aktıvteri men menshikti kapıtaly boıynsha eldegi ekinshi deńgeıdegi bankter arasynda tórtinshi orynda tur. Kún saıyn qazaqstandyqtarǵa 400-den astam kredıt beremiz», – dedi Basqarma tóraıymy.
Otbasy bankte 2,7 mln qazaqstandyq depozıtke aqsha salady. Bıyldyń ózinde bank arqyly 28 896 adam baspanaly boldy. Lázzat Ibragımova Otbasy banktiń ıpotekalyq baǵdarlamalaryn tanystyryp, sonyń ishinde «Naýryz» baǵdarlamasynyń sharttaryna toqtala ketti.
«Naýryz» baǵdarlamasy – mańyzdy áleýmettik joba. Baǵdarlamanyń iske qosylatyny jóninde bıyl Qazaqstan prezıdenti Qasym-Jomart Toqaev Ulttyq quryltaıda aıtqan bolatyn. 28 maýsymda baǵdarlamaǵa qatysýǵa ótinim qabyldaý aıaqtaldy. Jalpy 38 841 ótinim sátti túrde qabyldandy. Astana men Almatyda qaryzdyń joǵarǵy somasy – 36 mln teńge, qalǵan óńirlerde – 30 mln teńge. Paıyzdyq mólsherleme – 7-9 paıyz, al bastapqy jarna – 20 paıyz. Baǵdarlama jumys isteıtin jastarǵa, jas otbasylarǵa, Otbasy bank salymshylaryna, monoqalalar, aýdan ortalyqtary men eldi mekender turǵyndaryna arnalǵan. Ótinim berýshilerdiń 62 paıyzy – 35 jasqa deıingi jastar. Endi upaılar eseptelip, osy aptada banktiń resmı saıtynda baspanaly bolatyn qatysýshylardyń tizimi jarııalanady», – dedi Basqarma tóraıymy Lázzat Ibragımova.
«Naýryz» baǵdarlamasy 8 jylǵa josparlanǵan. Osy ýaqyt ishinde 68 myńǵa jýyq qazaqstandyq otbasy baspanaly bolady. Otbasy bank «Naýryz» baǵdarlamasyna qatysýshylarǵa kredıt berý úshin oblıgatsııalar shyǵarý arqyly qarajat tartýdy kózdep otyr. Olardyń quny bazalyq mólsherleme deńgeıin eskere otyryp, ornalastyrý kúnine qaraı aıqyndalady jáne 5 jyl ishinde turaqty bolady.
«Biz Ulttyq banktiń normatıvin oryndaımyz. Barlyq operatsııany tek ulttyq valıýtamyz – teńgemen jasaımyz. Depozıtte de, kredıtte de bekitilgen naqty mólsherleme bar. Sondyqtan qater joq. Investıtsııalyq saıasatqa sáıkes biz tek boryshtyq baǵaly qaǵazdarǵa ınvestıtsııa jasaı alamyz. Otbasy banktiń qarjy agenti degen mártebesi bolady. Oblıgatsııaǵa áleýmettik mártebe beriledi», – dedi Lázzat Ibragımova.
Oblıgatsııalardy ınvestorlardyń shekteýsiz sheńberi arasynda ornalastyrý josparlanyp otyr. Bul ekinshi deńgeıdegi bankter, saqtandyrý kompanııalary jáne tipti jeke tulǵalar bolýy múmkin. ıAǵnı, qazirdiń ózinde Otbasy bankte depozıtteri bar nemese salymshy bolýdy josparlap otyrǵan qazaqstandyqtar óz qarajattaryn bank oblıgatsııalaryna da ınvestıtsııalaı alady.
Shyǵarylǵan oblıgatsııalar áleýmettik baǵaly qaǵazdar mártebesine ıe bolady. Bul – Banktiń aınymastyǵynyń jáne onyń ESG qaǵıdalary boıynsha damýynyń kórsetkishi. Oblıgatsııa ustaýshylar úshin bul fakt Qazaqstan azamattarynyń baspanaly bolýyn qamtamasyz etý jónindegi memlekettiń áleýmettik mańyzdy mindetin sheshýge járdemdesý josparyndaǵy artyqshylyqtardyń biri bolady.
Áleýetti ınvestorlar úshin Otbasy bank senimdi emıtent. Búginde ol ekinshi deńgeıdegi bankter arasyndaǵy eń joǵary reıtıngterge, eldik deńgeıdegi reıtıngke (BBB) ıe. Bank nesıe portfeliniń eń jaqsy sapasyna ıe, bul 0,1% mólsherindegi NPL-diń tómen deńgeıimen rastalady. Bank sektoryndaǵy NPL-diń ortasha máni 3,12% ekenin eskersek, bul óte jaqsy kórsetkish.
«Naýryz» baǵdarlamasy boıynsha azamattarǵa kredıt berý úshin barlyǵy 1,7 trln teńgege oblıgatsııa shyǵarý josparlanyp otyr. Birinshi jyly úsh retten 300 mlrd teńge mólsherinde shyǵarylsa, keıingi jyldary 200 mlrd teńgeden shyǵarylady. Tartylǵan qarajat naryqtyq jaǵdaılar boıynsha qaryzǵa alynatyndyqtan, memleket Otbasy bank shyǵarǵan oblıgatsııalar boıynsha syıaqy mólsherlemesin sýbsıdııalaıdy dep boljanyp otyr.
Aıta ketsek, Qazaqstanda halyq sany artqan saıyn baspanaǵa suranys óte joǵary. 2023 jyldyń qorytyndysy boıynsha jan basyna shaqqanda turǵyn-jaı kólemi 23,9 sharshy metrdi qurady. BUU standarty boıynsha bul kórsetkish 30 sharshy metrge teń. Oǵan jetý úshin halyqtyń baspanaly bolýyna múmkindik beretin memlekettik baǵdarlamalar júzege asyrylyp jatyr. Al Otbasy bank Qazaqstanda turǵyn úı qurylys jınaq júıesin iske asyratyn jalǵyz bank bolyp otyr.
