Otbasy bank salymshylaryna eseptelgen memlekettik syıaqy mólsheri anyqtaldy
ASTANA. KAZINFORM — Ótken demalys kúnderi Otbasy banki salymshylarynyń depozıtterine memlekettik syıaqy esepteldi. 2025 jyldyń qorytyndysy boıynsha 2 530 829 qazaqstandyqqa memleket syıaqy berildi, dep habarlaıdy banktiń baspasóz qyzmeti.
Memleket syıaqysyn alǵandardyń jalpy sanynyń 388 799-y — jeke baspanasy joq jáne turǵyn úı kezeginde turǵan azamattar. Olardyń 237 688-i turǵyn úı kezegine buryn, kezekte.kz portalynda tirkelgen. Olar bolashaqta jyldyq mólsherlemesi 2%-dan* bastalatyn jeńildetilgen zaem alý úshin Otbasy bank depozıtterinde josparly túrde qarajat jınap jatyr. Taǵy 151 111 adam 2025 jylǵy 24 mamyrdan keıin orken.otbasybank.kz portalynda turǵyn úıge muqtaj retinde esepke qoıylyp, bıyl ǵana jınaqtaýdy bastady.
2025 jyldyń qorytyndysy boıynsha depozıtterine memleket syıaqysy eseptelgen kezekte turǵandardyń ishinde I jáne II toptaǵy 12 059 múgedek, 57 551 kópbalaly otbasy, múmkindigi shekteýli bala tárbıelep otyrǵan 10 679 otbasy, sondaı-aq «jetim balalar jáne ata-anasynyń qamqorlyǵynsyz qalǵan balalar» sanaty boıynsha turǵyn úı kezeginde turǵan 13 966 azamat bar.
Sonymen qatar turǵyn úı qurylys jınaq júıesiniń 303 406 jas qatysýshysy da memleket syıaqysyn aldy. Olardyń ata-analary bolashaqta baspana satyp alýyna negiz qalaý úshin balalardyń atyna Otbasy bank depozıtterin ashqan. Bıyl olardyń shottaryna 9,6 mlrd teńge kóleminde memleket syıaqysy esepteldi.
— Jalpy qazaqstandyqtarǵa eseptelgen memleket syıaqysynyń somasy 124,4 mlrd teńgeni qurady. Turǵyn úı qurylys jınaq júıesine qatysqan salymshy depozıtine eń kóbi 157 280 teńge aldy. Memleket syıaqysynyń eń joǵary mólsherin 591 709 qazaqstandyq — Otbasy bank klıentteri ıelendi, — delingen habarlamada.
Memleket syıaqysy eseptelgen 555 732 depozıt onlaın túrde — mobıldi qosymsha jáne beıneservıs arqyly ashylǵan. Memleket syıaqysymen yntalandyrylǵan jınaq shottarynyń eń kóbi Shymkent qalasynyń turǵyndary arasynda — 164 146 salym, Astana qalasynda — 126 341 salym jáne Almaty qalasynda — 113 297 salym ashylǵan. Dál osy qalalarda memleket syıaqysy eseptelgen jınaq shottarynyń úlesi joǵary.
Memleket syıaqysyn tóleýdi zańǵa sáıkes memleket qamtamasyz etedi. Osylaısha ol azamattardy qoldap, baspanaly bolýǵa tezirek qarajat jınaýǵa kómektesedi.
— Aǵymdaǵy jyly memleket syıaqysy ótken jyldary syıaqy berilgen salym somasyna qaıta eseptelmeıdi. Eger memleket syıaqysy beriletin jınaq somasy 200 AEK-ten assa, syıaqy berilmegen qaldyq soma kelesi jyly memleket syıaqysyn esepteý kezinde eskeriledi. Mysaly, eger 2024 jyldyń qorytyndysy boıynsha salymshy depozıtte 1 mln teńge jınasa, memleket syıaqysy tek 200 AEK-ke teń somaǵa ǵana esepteldi. Qalǵan aıyrma 2025 jyldyń qorytyndysy boıynsha memleket syıaqysyn esepteý kezinde eskerildi, — dep túsindirdi vedomstvo.
Eger bir salymshynyń bankte birneshe depozıti bolsa, memleket syıaqysy onyń tańdaýy boıynsha tek bireýine ǵana esepteledi. Memleket syıaqysy esepteletin depozıtti ózgertý úshin salymshy esepti jyl aıaqtalǵanǵa deıin Otbasy bank mobıldi qosymshasynda qajetti jınaq shotyn belgilep, tıisti ózgeristi óz betinshe engizýi tıis.
— 2026 jyldyń qorytyndysy boıynsha memleket syıaqysynyń eń joǵary mólsheri 173 000 teńge. Ony alý úshin Otbasy bank shotynda keminde 865 000 teńge (200 AEK) jınaqtalýy qajet. Ol úshin salymshylar aı saıyn shamamen 73 000 teńgeden depozıtke salyp otyrýy tıis. Bank syıaqysy men memleket syıaqysyn qosa eseptegende, Otbasy bank depozıtteri boıynsha jyldyq tıimdi mólsherleme 14%-ǵa deıin jetýi múmkin. Otbasy banktegi jınaqtar qazaqstandyqtarǵa jyldyq mólsherlemesi 3,5%-dan bastalatyn (JTSM 3,6%-dan 4,4%-ǵa deıin) qoljetimdi nesıe alyp, jeke baspanasyn satyp alýǵa múmkindik beredi, — delingen bank habarlamasynda.
Osydan buryn Otbasy bank 2 naýryzdan bastap turǵyn úı kezeginiń tártibin ózgertetinin jazǵanbyz.