Otbasy bank «Naýryz» baǵdarlamasy boıynsha kredıt berý úshin KASE-den 102,7 mlrd teńge tartty
ASTANA. KAZINFORM – KASE-de Otbasy banktiń («Báıterek» holdınginiń enshiles uıymy) áleýmettik oblıgatsııalarynyń eki shyǵarylymyn ornalastyrý boıynsha mamandandyrylǵan saýda-sattyq ótti. Onyń nátıjeleri boıynsha «Naýryz» baǵdarlamasyna qatysýshylarǵa kredıt berý úshin 102,7 mlrd teńge tartyldy.
Bir oblıgatsııanyń nomınaldy quny – 1 000 teńge. Qarajat tartylǵan mólsherleme saýda-sattyqty ótkizý qorytyndysy boıynsha aıqyndaldy jáne jyldyq 18,0%-dy qurdy.
Oblıgatsııalardyń aınalym merzimi – 5 jyl. Kýpondy tóleý kezeńdiligi – jylyna 2 ret.
Bank oblıgatsııalaryn satyp alýdyń artyqshylyǵy – bul Otbasy bankiniń QR qarjy agenttikteriniń tizbesine kiretindigine, sondaı-aq oblıgatsııalardyń KASE «resmı» tizimine engizilýine baılanysty kýpondyq syıaqy úshin salyq salýdyń bolmaýy. Sonymen qatar banktiń oblıgatsııalary repo MQÚO (Emıtenttiń memlekettik qatysý úlesi bar oblıgatsııalary) sebetine engiziledi jáne olar boıynsha market-meıkerdiń bolýy boljanady.
Buǵan deıin Otbasy bank 85,72 mlrd teńge tartqan bolatyn. Bul qarajatqa 4 000-nan astam qazaqstandyq januıaǵa qaryz berildi. «Naýryz» baǵdarlamasy boıynsha 2 702 qazaqstandyq turǵyn úı aldy, taǵy 1 566 jumysshy kásip ókilderi «Naýryz jumysker» jańa baǵytynyń arqasynda baspanaly boldy.
Eń kóp qonystoı Astanada atalyp ótti – onda 1 116 qaryz berildi. Almatyda «Naýryz» baǵdarlamasynyń 562 qatysýshysy turǵyn úı satyp aldy, Shymkentte 367 qaryz berildi.
«Naýryz jumysker» baǵyty boıynsha qol jetimdi nesıelerdiń 60%-dan astamyn ónerkásip jáne qurylys salalaryndaǵy jumysshy kásipteriniń ókilderi aldy, qaryzdardyń 21%-y kólik salasynyń ókilderine jáne 13%-y energetıka salasynyń qyzmetkerlerine berildi.
– Otbasy banktiń oblıgatsııalary – áleýmettik mártebege ıe. Bul oblıgatsııalar – joǵary kiristilik pen emıtenttiń tómen táýekeliniń sırek úılesimi, sondyqtan ınvestor retinde jeke tulǵalardyń saýdaǵa qatysýy bizdi qýantady. Odan bólek, bul qarajat sol kúni-aq klıentterge jetti. Búginniń ózinde 12 zaem berildi, - dep atap ótti Otbasy banktiń Basqarma tóraıymy Lázzat Ibragımova.
Otbasy bank áleýetti ınvestorlar úshin senimdi emıtent sanalady. Búginde ol eldik deńgeıinde (BBB, boljam «Turaqty») Fitch agenttiginen jáne Baa1, boljam «Turaqty», deńgeıinde Moody’s Investors Service agenttiginen joǵary kredıttik reıtıngini, sondaı-aq, halyqaralyq reıtıngtik agenttik Sustainable Fitch-ten «3» deńgeıinde jáne «55» baǵalaýymen ESG reıtıngisin alǵan.
Banktiń kredıttik portfeliniń sapasy óte jaqsy, bul 0,12% mólsherinde NPL tómen deńgeıimen rastalady (bank sektoryndaǵy NPL ortasha máni 3,37% deńgeıinde). 2025 j. 1 shildedegi jaǵdaı boıynsha Otbasy bank aktıvteri jáne menshikti kapıtaly boıynsha EDB arasynda 4-oryndy ıelenedi.
Bıylǵy «Naýryz» baǵdarlamasyna qatysýshylardyń tizimi 12 000 qazaqstandyqtan quralady. Onyń 4 577-si nemese 38,1%-y turǵyn úıge kezeginde tur. Kezekte turǵandardyń jartysyna jýyǵy halyqtyń áleýmettik osal sanatyna jatady.
Baǵdarlama azamattardyń arasynda joǵary suranysqa ıe bolǵandyqtan, osy jyly onyń sheńberinde qaryz berý qarjylandyrý josparynan oza júrýde. Sondyqtan bank maýsym men shilde aılarynda qaryz berýge ýaqytsha lımıt qoıýǵa májbúr boldy. Osy kezeńde «Naýryz» baǵdarlamasy jáne «Naýryz jumysker» baǵyty boıynsha qaryzdardy tek kepil shartyn tirkep, keste men qaryz shartyna qol qoıǵan adamdar ǵana aldy. Baǵdarlamaǵa qatysqan osyndaı 275 adamnyń barlyǵyna nesıe berildi.
2025 jylǵy 13 tamyzdan bastap Otbasy bank «Naýryz» baǵdarlamasy jáne «Naýryz jumysker» baǵyty boıynsha qaryzdar berýin qaıta bastady.