Otbasy bank qashan ıslamdyq ıpoteka bere bastaıdy
ASTANA. KAZINFORM – Búgin Astanada «Otbasy bank» Islamdyq qarjy jáne bıznes qaýymdastyǵymen jáne qurylysshylar odaǵymen birlesip memorandýmǵa qol qoıdy. Tolyǵyraq Islamdyq qarjy jáne bıznes qaýymdastyǵynyń tóraǵasy, Astana halyqaralyq qarjy ortalyǵynyń ıslam qarjy baǵyty boıynsha jetekshisi Mádına Týkýlova aıtyp berdi.
- Memorandým arqyly biz Qazaqstanda «Otbasy bank» tarapynan ıslamdyq ıpotekany engizý mehanızmderin birlesip pysyqtaýdy kózdep otyrmyz. Qazir múmkin quraldar ázirlenip jatyr, ózderińiz biletindeı, Qazaqstanda dástúrli bankterdiń ıslamdyq qarjylandyrý usynýǵa múmkindigi joq. Qazir Qarjy naryǵyn retteý jáne damytý agenttigi jańa bank týraly zań aıasynda dástúrli bankterge ıslamdyq qarjylandyrý múmkindigin beretin «ıslamdyq terezelerdi» engizý máselesin talqylap jatyr. Alaıda qazirgi ýaqytta naqty mehanızmder bolmaǵandyqtan biz «Otbasy bankpen» birlesip, jaqyn arada bul bastamany elimizde qalaı iske asyrýǵa bolatynyn qarastyryp jatyrmyz, - dedi Mádına Týkýlova elordada ótip jatqan ıslamdyq qarjylandyrý jáne bıznes forýmynda.
Onyń aıtýynsha, dál qazir dástúrli bankterdiń ıslamdyq qarjylandyrý múmkindiginiń qandaı formada bolatyny ázirge naqty belgisiz, biraq bastama bar.
- Biz retteýshiden naqty aqparatty kútip otyrmyz jáne qaýymdastyq retinde qabyldanatyn qujattarǵa saraptamalyq qoldaý kórsetýge daıynbyz. Bizdiń maqsat – qujattardyń sapaly ári mazmundy bolýyna atsalysý. Alaıda merzim boıynsha naqty málimetter joq. Túsinýimshe, bank týraly jańa zańnyń merzimine baılanysty bolady, ıaǵnı, jańa zań aıasynda ıslamdyq terezelerge qatysty bap engiziledi. Zańdy jyl sońyna deıin qabyldaýdy josparlap otyr, - deıdi ol.
Astanada alǵash ıslamdyq qarjylandyrý jáne bıznes forýmy ótip jatyr. Forýmdy Islamdyq qarjy jáne bıznes qaýymdastyǵy TIDAM agenttigimen birlesip, Astana halyqaralyq qarjy ortalyǵynyń qoldaýymen uıymdastyryp otyr. Oǵan 200-den astam adam qatysty.
Aıta keteıik, Astanada alǵash ıslamdyq qarjylandyrý jáne bıznes forýmy ótip jatyr.