Otbasy bank ıpotekaǵa qabyldanatyn úılerge qoıylatyn talaptardy ózgertti
ASTANA. KAZINFORM – Otbasy bank kepilge qabyldanatyn turǵyn úılerge qatysty talaptardy jańartty. Endi beton jáne keramzıtbeton negizindegi paneldi úılerdegi páterlerdiń paıdalaný merzimi burynǵydan 10 jylǵa uzartyldy, dep habarlaıdy Otbasy bank.
Buǵan deıin mundaı úılerdegi páterler úıdiń paıdalaný merzimi 50 jyldan aspaǵan jaǵdaıda ǵana kepilge qabyldanatyn. Endi bul merzim 60 jylǵa deıin uzartyldy.
– Endi Otbasy bank kepilge beton jáne keramzıtbeton negizindegi paneldi úılerdegi páterlerdi, eger kredıttik ótinim berilgen kúni úıdiń paıdalaný merzimi 60 jyldan aspasa, qabyldaıdy. Buǵan deıin bul merzim 50 jyl bolatyn, – delingen habarlamada.
Sonymen qatar bank SIP-panelderden salynǵan jeke turǵyn úılerdi de kepilge qabyldaı bastady. Mundaı úı qurylys salýshydan satyp alynýy jáne kredıttik ótinim berilgen kúni paıdalanýǵa berilgenine 5 jyldan aspaýy qajet.
SIP-panelden salynǵan turǵyn úıge birqatar talap qoıylady. Atap aıtqanda, SIP-panelderdiń sáıkestik sertıfıkaty bolýy tıis. Úıdiń irgetasy sýǵa tózimdi materıaldardan – temirbeton plıtalardan, betonnan nemese být tasynan salynýy qajet.
– Úıdiń ishki jáne syrtqy árleýi tolyq aıaqtalyp, barlyq qajetti ınjenerlik kommýnıkatsııalarmen – sýmen, jylýmen, káriz jáne elektr jelilerimen qamtamasyz etilýi tıis, – dep túsindirdi bankten.
Jańa talaptar Otbasy bank arqyly ıpotekalyq nesıe rásimdeý kezinde kepilge qabyldanatyn turǵyn úılerdiń aıasyn keńeıtedi.
Aıta keteıik, almatylyqtarǵa turǵyn úı mańynan bir avtoturaq orny tegin beriledi.
