Otbasy bank Dırektorlar keńesiniń tóraǵasy bolyp táýelsiz dırektor saılandy
ASTANA. KAZINFORM - «Otbasy bank» AQ Dırektorlar keńesi Jalǵyz aktsıonerdiń – «Báıterek» ulttyq ınvestıtsııalyq holdıngi» AQ usynymy negizinde Dırektorlar keńesiniń tóraǵasy qyzmetine banktiń táýelsiz dırektory Sanjar Jamalovty saılady, dep habarlaıdy Otbasy bank.
Bul sheshim «Báıterek» holdınginiń kompanııalar tobynda korporatıvtik basqarýdy jetildirý, táýelsiz dırektorlar ınstıtýtyn nyǵaıtý jáne korporatıvtik basqarýdyń úzdik halyqaralyq tájirıbelerin engizý baǵytynda júrgizip otyrǵan júıeli jumysynyń zańdy jalǵasy.
Táýelsiz dırektordyń Dırektorlar keńesine tóraǵalyq etýi strategııalyq basqarýdyń tıimdiligin arttyrýǵa, Dırektorlar keńesiniń táýelsizdigin kúsheıtýge jáne basqarýshylyq sheshimderdiń sapasyn odan ári jetildirýge múmkindik beredi.
Atalǵan sheshim Qazaqstannyń turǵyn úı saıasatyn iske asyratyn negizgi damý ınstıtýttarynyń biri – Otbasy bank úshin erekshe mańyzǵa ıe. Bank azamattarǵa turǵyn úı qurylys jınaq júıesine qatysýǵa, jeńildikti ıpotekalyq baǵdarlamalardy paıdalanýǵa jáne turǵyn úıdiń qoljetimdiligin arttyrýǵa baǵyttalǵan basqa da qarjylyq quraldarǵa qol jetkizýge múmkindik beredi.
Áleýmettik mańyzy joǵary uıymdar úshin tıimdi korporatıvtik basqarý turaqty damýdy qamtamasyz etýdiń, táýekelderdi tıimdi basqarýdyń jáne qoǵam senimin nyǵaıtýdyń mańyzdy tetigi sanalady. Bul qazirgi zamanǵy ESG qaǵıdattaryna tolyq sáıkes keledi.
Dırektorlar keńesiniń tóraǵasy Keńestiń jumysyn úılestirýde, strategııalyq basymdyqtardy aıqyndaýda, Keńes músheleriniń tıimdi ózara is-qımylyn qamtamasyz etýde jáne kompanııanyń damý máselelerin jan-jaqty ári obektıvti qaraýda mańyzdy ról atqarady. Halyqaralyq tájirıbe kórsetkendeı, Dırektorlar keńesine táýelsiz dırektordyń tóraǵalyq etýi qabyldanatyn sheshimderdiń obektıvtiligin kúsheıtip, Keńes jumysynyń tıimdiligin arttyrýǵa, sondaı-aq aktsıoner men basqa da múddeli taraptardyń múddeler teńgerimin saqtaýǵa yqpal etedi.
Qazaqstanda táýelsiz dırektorlardyń Dırektorlar keńesine tóraǵalyq etý tájirıbesin damytý kásibı qaýymdastyqtyń da nazarynda. «Báıterek» holdınginiń ókilderi «Atameken» ulttyq kásipkerler palatasy janyndaǵy Korporatıvtik basqarý jónindegi ulttyq keńestiń quramyna kiredi. Keńes aıasynda korporatıvtik basqarýdy jetildirýdiń zamanaýı tásilderi, onyń ishinde táýelsiz dırektorlardyń rólin kúsheıtý jáne olardy ekonomıkanyń túrli salalaryndaǵy kompanııalardyń dırektorlar keńesine tóraǵa etip saılaý tájirıbesin keńeıtý máseleleri qarastyrylady.
Otbasy bank Dırektorlar keńesiniń tóraǵasy bolyp táýelsiz dırektordyń saılanýy «Báıterek» holdınginiń kompanııalar tobynda korporatıvtik basqarýdyń zamanaýı úlgisin qalyptastyrý jolyndaǵy kezekti mańyzdy qadam boldy. Bul tásil halyqaralyq standarttarǵa saı keledi, táýelsiz baqylaýdy kúsheıtýge, strategııalyq basqarý sapasyn arttyrýǵa jáne memleket úshin mańyzdy áleýmettik-ekonomıkalyq mindetterdi oryndaıtyn uıymdardyń uzaq merzimdi ornyqty damýyn qamtamasyz etýge yqpal etedi.
Osyǵan deıin Fitch Ratings agenttigi Otbasy bankiniń reıtıngin BBB deńgeıinde rastaǵany týraly jazdyq.
