Otbasy bank basshysy turǵyn úı kezegindegi zańsyzdyqtyń mán-jaıyn túsindirdi
ASTANA. KAZINFORM — «Otbasy bank» basqarma tóraǵasy Lázzat Ibragımova turǵyn úı kezegin zańsyz jyljytý boıynsha jemqorlyq faktileri týraly tilshiler suraǵyna jaýap berdi.
Onyń sózinshe, bul — 2025 jyldyń sáýir-mamyr aılarynda tirkelgen bir rettik jaǵdaı.
— Bul bir ǵana oqıǵa boldy. Azamat turǵyn úı kezeginde turǵan, alaıda jeńildigi joǵary sanatqa ótý úshin óz sanatyn «múgedektigi bar bala tárbıelep otyrǵan otbasy» retinde ózgertken, — dedi Lázzat Ibragımova Úkimette ótken brıfıngte.
Bank tóraǵasynyń aıtýynsha, atalǵan jaǵdaı 2025 jylǵy tamyzda jańa aqparattyq júıe iske qosylǵanǵa deıin bolǵan.
— Biz budan úlken sabaq aldyq. Tsıfrlandyrý kezinde árbir árekettiń tsıfrlyq izi saqtalýy óte mańyzdy ekenin túsindik. Júıege kimniń qandaı logınmen kirgeni, qandaı áreket jasaǵany tolyq tirkelýi qajet, — dedi ol.
Oqıǵaǵa banktiń eki qyzmetkeri — óńirlik fılıaldardyń biriniń mamany men ortalyq apparattyń bıznes-taldaýshysy qatysqan. Otbasy banktiń bastamasymen olardyń eńbek sharttary buzylyp, jumystan shyǵarylǵan.
Sondaı-aq bank qyzmetkerlerdi qylmystyq jaýapqa tartý týraly quqyq qorǵaý organdaryna aryz joldaǵan. Qazir qylmystyq ister tirkelip, tergeý júrgizilip jatyr.
Lázzat Ibragımova atalǵan qyzmetkerlerdiń memlekettik fýnktsııalardy oryndaýǵa ýákiletti tulǵalar qataryna jatpaıtynyn atap ótti.
— Eshqandaı shyǵyn kelgen joq. Zańsyz bólingen páter nesıe shartyn rásimdeý kezeńinde toqtatylyp, qaıtaryldy. Keıin ol turǵyn úıdi bólý protsesine qaıtadan qatystyryldy, — dedi bank basshysy.
Keshe «Otbasy bank» qyzmetkerleri zańsyz aqsha alyp, jalǵan qujat jasaǵany týraly aqparat jarııalanǵan edi.
Tsıfrlandyrýdyń arqasynda Otbasy bank turǵyn úıdi bólýdi úsh ese jedeldetken.
