Otbasy bank Azııa damý bankimen ózara túsinistik týraly Memorandýmǵa qol qoıdy
ASTANA. KAZINFORM – Búgin elordada ótken jahandyq ınvestıtsııalar boıynsha VII qazaqstandyq dóńgelek ústel otyrysy (KGIR-2024) barysynda «Otbasy bank» AQ men Azııa damý banki arasyndaǵy elimizde ınklıýzıvti jáne jasyl turǵyn úılerdi qarjylandyrýdy ilgeriletý jobasy boıynsha ózara túsinistik týraly memorandýmǵa qol qoıyldy.
«Búgin Azııa damý bankimen ortaq memorandýmǵa qol qoıyldy. Baǵdarlama 2025 jyldyń ekinshi jartysynda iske qosylady, qazir barlyq shart rásimdelip jatyr. Azııa damý banki eki baǵytty maquldap otyr, birinshisi - jasyl ıpoteka. Bizde Qazaqstandyq jasyl qurylys keńesimen birlesip júzege asyrylyp jatqan pılottyq joba bar. Bul kommertsııalyq birlestik emes, qoǵamdyq birlestik, olar bizdiń qurylys kompanııalarymyz salyp jatqan turǵyn úılerdiń energııa tıimdiligine sertıfıkattaý júrgizedi. Árbir turǵyn úı keshenine belgili bir baǵalaý beriledi. Ol kompanııalardyń sertıfıkattaý deńgeıine baılanysty altyn, kúmis jáne qola bolyp bólinedi», - dedi «Otbasy bank» AQ Basqarma tóraǵasy Lázzat Ibragımova elordada ótken jahandyq ınvestıtsııalar boıynsha VII qazaqstandyq dóńgelek ústel barysynda.
Bank tóraǵasynyń aıtýynsha, búginde elimizde «Jasyl ıpoteka» joǵary suranysqa ıe.
«Jyldyq syıaqysy 12,5% (JTSM 13,3% bastap 18,1% deıin) jáne 20% bastapqy jarnamen salymshylar energııany únemdeıtin turǵyn úıdi satyp ala alady. Ipotekanyń bul túri úlken suranysqa ıe. Bıyl pılottyq túrde jobany óz qarajatymyzǵa bastadyq, Azııa damý banki atalmysh baǵdarlamamen tanysqan soń, bizdi qoldap otyr. Osylaısha, Qazaqstandyq jasyl qurylys keńesi jáne Qurylysshylar odaǵymen keńese kele energııany tıimdi paıdalanatyn turǵyn úı týraly oılanýymyz kerek degen qorytyndyǵa keldik. Óıtkeni, kommýnaldyq qyzmet tarıfimen qatar baspana baǵasy da óse túsedi. Sondyqtan qazir salynyp jatqan turǵyn úıdiń energııany únemdeýi, jylý oqshaýlaý júıesi deńgeıiniń joǵary bolýy mańyzdy, ásirese bul másele elimizdiń soltústik óńirlerine qatysty. Bul turǵyda Azııa damý banki bizge tehnıkalyq turǵydan qoldaý kórsetedi», - deıdi ol.
Odan bólek, Azııa damý banki qoldap otyrǵan Otbasy bankiniń ekinshi jobasy genderlik (ınklıýzıvti) turǵyn úı ıpotekasy.
«Ózderińiz biletindeı, bizde «Umaı» áıelderge arnalǵan ıpotekasy bar. Ótken jyly Azııa damý banki bizge osy joba úshin «genderlik chempıon» mártebesin berdi. Ekonomıkalyq ilgerileýde áıeldiń óz baspanasy bolýy kópshiliktiń qyzyǵýshylyǵyn arttyrdy. Osylaısha, áıelder ajyrasqan jaǵdaıda nemese turmystyq zorlyq-zombylyqqa tap bolǵan jaǵdaıda óz atynda úıi bolsa, dalada qalmaıdy. Analardy qorǵaý arqyly biz balalardy da qorǵaımyz. «Umaı» ıpotekasy boıynsha nesıe mólsherlemesi bazalyq mólsherlemege baılanysty, óıtkeni aqsha Azııa damý bankiniń jergilikti naryǵy arqyly tartylady. Biz kredıt boıynsha mólsherleme 12 paıyzdan joǵary bolmaýy úshin bazalyq mólsherlemeniń tómendeýinen úmittenemiz», - dedi Lázzat Ibragımova.
Aıta ketsek, qazaqstandyqtar eki baǵyt boıynsha bastapqy, qaıtalama, sondaı-aq salynyp jatqan turǵyn úılerdi satyp alýǵa jáne jóndeýge zaem ala alady dep josparlanyp otyr.
