Otbasy bank Astanadaǵy eń úzdik salyq tóleýshilerdiń biri retinde marapattaldy
ASTANA. KAZINFORM — Otbasy bank Astana qalasy boıynsha Memlekettik kirister departamentinen marapat aldy. Bank Nura aýdany boıynsha «Úzdik salyq tóleýshi» nomınatsııasynda jáne qalanyń bıýdjetin tolyqtyrýǵa qosqan úlesi úshin marapattaldy.
Banktiń baspasóz qyzmeti atap ótkendeı, bul — mekemeniń ustanyp otyrǵan ashyq ári adal salyq saıasatynyń joǵary baǵalanýy.
Sońǵy bir jylda Otbasy bank tóleıtin salyqtar men áleýmettik tólemderdiń kólemi aıtarlyqtaı ósti, jáne bul oń dınamıka aldaǵy ýaqytta da saqtalady. 2024 jyly bank 34,5 mlrd teńge salyq tóledi.
2025 jyldyń 11 aıynda bul kórsetkish 42 mlrd teńgege jetti. Onyń 35,3 mlrd teńgesi respýblıkalyq bıýdjetke baǵyttaldy. Respýblıkalyq bıýdjet — eldiń jalpy qory, ıaǵnı osy qarajat esebinen ásker men polıtsııanyń jumysy, medıtsına, jol qurylysy, zeınetaqylar men memlekettik baǵdarlamalardy qarjylandyrylady.
Taǵy 2,98 mlrd teńgeni bank jergilikti bıýdjetterge aýdardy. 2025 jylǵy 2 shildege deıin Otbasy bank Almaty qalasynyń salyq tóleýshisi boldy. Odan keıin resmı túrde Astananyń salyq tóleýshisine aınaldy. Endi bank tóleıtin salyqtarynyń bir bóligi Astanada qalady. Salyq qala turǵyndaryna qajetti salalar, ıaǵnı: mektepter men balabaqshalardyń jumysy, emhanalar, kósheler men aýlalardy jóndeý, qoǵamdyq kólik syndy baǵyttarǵa ketedi.
Bıyl Otbasy bank zeınetaqy jarnalary, MÁMS jáne basqa da áleýmettik tólemderge 3,65 mlrd teńge baǵyttady. 2025 jyldyń qorytyndysy boıynsha bank 51,7 mlrd teńge salyq pen áleýmettik tólemder aýdarýdy josparlap otyr — bul ótken jylmen salystyrǵanda 17,2 mlrd teńgege artyp rekordtyq kórsetkish bolmaq.
— 2025 jyl Otbasy bank úshin erekshe jyl boldy. Biz 600 adamdyq komandamen Astanaǵa kóshtik. Banktiń alǵashqy marapaty — elordadaǵy iri salyq tóleýshi retinde tanylýymyz — biz úshin úlken mánge ıe. Jańa astanalyqtar retinde jergilikti bıýdjetke túsetin qarjyny arttyrý úshin bar kúshimizdi salamyz. Ásirese, jas áriptesterimiz erekshe yntamen kóshti, sebebi olar osy qalada otbasyn quryp, baspana máselesin sheshemiz dep úmittenedi, — dedi Otbasy bank basqarma tóraıymy Lázzat Ibragımova.
Otbasy bankinde elorda jastaryna qoljetimdi sharttarmen baspana alýǵa kómektesetin tıimdi qural bar. Ol — «Elorda jastary» baǵdarlamasy. Astanada bul baǵdarlama 2021 jyldan beri jergilikti ákimdiktiń qoldaýymen jumys isteıdi. Osy ýaqyt ishinde baǵdarlamany iske asyrýǵa 23,5 mlrd teńge bólindi, onyń negizgi bóligi — 20,4 mlrd teńge — qala ákimdigi tarapynan baǵyttaldy. «Elorda jastary» baǵdarlamasynyń arqasynda 960 adam jańa baspanaǵa ıe boldy. Baǵdarlama boıynsha bastapqy jarna nebári 10%, al nesıe mólsherlemesi — jylyna 5%*. Baǵdarlamaǵa qatysý úshin Otbasy bankindegi depozıtke qarajat jınap, ótinim qabyldaý bastalatyn kúnder týraly jańalyqtardy qadaǵalap otyrý qajet.
Qazirgi ýaqytta bank memlekettik turǵyn úı saıasatyn iske asyrýda negizgi oryn alady. Ol ásirese kómekke muqtaj azamattarǵa qoldaý kórsetedi. Áleýmettik turǵydan osal toptarǵa bank jeńildetilgen qaryzdar usynady.
Sońǵy eki jylda Otbasy bank arqyly baspana kezeginde turǵan 407 adam jańa úıge ıe boldy. Buǵan 1 jáne 2 top múgedekteri, múmkindigi shekteýli balalardy tárbıelep otyrǵan otbasylar, jetim balalar kiredi. Olarǵa bastapqy jarna 10% bolǵan jaǵdaıda, 2%** jáne 5%*** mólsherlememen qaryzdar berildi. Jeńildetilgen qaryzdardyń jalpy somasy 6,05 mlrd teńgeni qurady — bul qarajat memlekettik bıýdjetten bólindi.
*JTSM 5,2% ten 5,7% deıin
** JTSM 2,0% den 2,1% deıin
* JTSM - 5,2% den 5,8% deıin