Otbasy bank Almatydan Astanaǵa kóship jatyr — aqaý sebepteri
ASTANA. KAZINFORM — Otbasy banki óz servısterinde ýaqytsha aqaý baıqalǵanyn jáne ol tehnıkalyq is-sharalardyń júrgizilýine baılanysty ekenin málimdedi.
Banktiń habarlaýynsha, 2025 jyldyń 31 jeltoqsany men 2026 jyldyń 2 qańtary aralyǵynda bankte qarjy jylyn jabý jumystary júrgizilgen.
— 2026 jyldyń 3 qańtarynda saǵat 03:00–de negizgi derekterdi óńdeý ortalyǵynyń esepteý qýattaryn Almatydan Astana qalasyna kóshirý boıynsha josparly jumystar bastaldy. Bul protsess servısterdiń toqtap qalýyn barynsha azaıtý maqsatynda demalys kúnderine josparlanǵan edi. Bank quramynda 40 server, 10 derekterdi saqtaý júıesi jáne 6 jelilik jabdyq bar. Bank 10 tehnologııalyq jabdyq sóresin kóshirdi, — dep jazylǵan resmı málimdemede.
Jabdyqtardy bank qyzmetkerleriniń ózi tasymaldaǵan, merdigerler men qosymsha servısterdi tartylmaǵan. Bul shyǵyndardy ońtaılandyrý jáne qarajatty únemdeý maqsatynda jasaldy.
Serverlik jabdyq pen dıskilik massıvter sýyq mezgilde tasymaldanǵandyqtan, jetkizilgennen keıin jabdyqtar normatıvtik temperatýralyq kórsetkishterge jetkenshe arnaıy oryndarǵa ornalastyryldy.
Montajdaý jáne iske qosý kezeń-kezeńimen júrgizilip, árbir júıe boıynsha qosylymnyń durystyǵy, jumys turaqtylyǵy jáne derekterdiń tutastyǵy tekserildi.
— Júıelerdi 2026 jyldyń 5 qańtarynda saǵat 09:00–ge deıin iske qosý josparlanǵan edi. Alaıda qosymsha baptaý men tekserý qajet bolyp, júıelerdi iske qosý keshiktirildi. Saǵat 15:00–degi jaǵdaı boıynsha bank Colvir avtomattandyrylǵan banktik aqparattyq júıesin (ABIS), tólem júıesin, BPM, BPM 2.0, CRM, 300 nómiri boıynsha kiris qońyraýlaryn óńdeý júıesin, sondaı-aq birqatar negizgi ishki aqparattyq júıeni iske qosty, — dep túsindirdi Otbasy bank.
Qazirgi ýaqytta tsıfrlyq qyzmet kórsetý kanaldary kezeń-kezeńimen iske qosylyp jatyr. Aldaǵy ýaqytta barlyq mańyzdy aqparattyq júıe tolyq qalpyna keltirip, banktiń qalypty rejımde jumys isteýi josparlanyp otyr.
Bank júıelerdiń jumys qabiletin turaqty baqylaýda ustap otyr. Mańyzdy aqaýlar, derekterdiń joǵalýy nemese aqparattyq resýrstardyń tutastyǵynyń buzylýy tirkelgen joq. Barlyq qyzmetti qalypty rejımde qalpyna keltirý jumystary jalǵasyp jatyr.
Klıentter 2026 jyldyń 1, 2, 3, 4, 5 jáne 6 qańtar kúnderine josparlanǵan kredıtter boıynsha aı saıynǵy tólemderdi 2026 jyldyń 7 qańtary saǵat 20:00–ge deıin tóleı alady. Bul rette bank ony merzimi ótken bereshek retinde eseptemeıdi jáne ósimpul eseptemeıdi. Bul kezeńdegi merziminen keshiktirilgen tólemder týraly aqparat kredıttik bıýroǵa jiberilmeıdi.
Buǵan deıin Otbasy bank qosymshasy men enpf-otbasy portaly ýaqytsha istemeı turǵanyn jazǵan edik.