Otbasy bank Almatydaǵy buzylǵaly turǵan turǵyn úı keshenine qatysty jaǵdaıdy túsindirdi

ALMATY. KAZINFORM – Almatyda Montblanc turǵyn úı kesheniniń turǵyndary nysannyń buzylýy múmkin ekenine alańdaýly. Olardyń sózinshe, baspanany Otbasy bank arqyly ıpotekamen satyp alǵan, endi keshen buzylǵaly jatsa da, nesıeni tóleýge mindetti.

Alaıda Otbasy bank bul nysan boıynsha qurylys kompanııasymen eshqandaı kelisimshart jasalmaǵanyn málimdedi. Bank Montblanc kesheni týraly aqparat nemese jarnama taratpaǵanyn da habarlady.

Banktiń aqparatynsha, Montblanc keshenindegi páterler memlekettik turǵyn úı baǵdarlamalarymen emes, kommertsııalyq negizde satylǵan.

– Montblanc turǵyn úı kesheninen baspana alý úshin aralyq qaryzdar berilgen. Bul nesıe túri arqyly naryqtaǵy kez kelgen jyljymaıtyn múlikti – ekinshi deńgeıli turǵyn úıdi de qurylys salýshydan tikeleı de satyp alýǵa bolady. Sondaı-aq ekinshi nemese úshinshi baspana satyp alýǵa múmkindik beredi. Mundaı qaryzdy alý úshin shotyńyzda nesıe somasynyń 50%-y bolýy qajet. Klıentter satyp alýǵa bolatyn nysandy ózi tańdaǵan jáne nesıege ótinish berý úshin Otbasy bankke júgingenimen qatar, zańnama talaptaryna sáıkes tolyq qujat paketin usynǵan.

Barlyq nesıe qaryz alýshylardyń qolyndaǵy basqa múlikti kepilge qoıý shartymen berilgen jáne nesıe kelisimsharttary jasalǵan sáttegi qoldanystaǵy zańnama sheńberinde júzege asyrylǵan, - delingen málimdemede.

Qarjy uıymynyń málimetinshe, 2022 jylǵy 14 qańtar men 29 shilde aralyǵynda Otbasy bank Montblanc keshenindegi páterlerdi satyp alýǵa nebári 5 nesıe bergen. Bul – keshendegi jalpy páter sanynyń 5%-y ǵana. Jalpy nesıe kólemi – 232,4 mln teńge. Búginde onyń bireýi tolyq ótelgen, al tórt qaryz boıynsha bereshek – 55,4 mln teńge. Barlyq qaryz alýshy óz qaryzyn ótep jatyr.

Bank qarjylyq jaǵdaıy nasharlaǵan bir klıentke 2026 jylǵy naýryzǵa deıin tólemdi keıinge shegerýmen qaıta qurylymdaý jasaǵan. Taǵy bir qaryz alýshydan osyndaı ótinish túsken.

Otbasy bank zańnamaǵa sáıkes tólemderdi toqtata turý tek nesıe alaıaqtyq jolmen rásimdelgen jaǵdaıda ǵana múmkin ekenin eske saldy. Qazirgi tańda quqyq qorǵaý organdary tarapynan alaıaqtyq týraly aqparat túspegen.

Sonymen qatar bank qaryz alýshylardyń qurylys kompanııasynan keltirilgen shyǵyndy óndirip alýǵa quqyly ekenin atap ótti. 

– Qazaqstan Respýblıkasynyń Qylmystyq-protsessýaldyq kodeksine sáıkes, qaryz alýshylar ózderine zııan keltirgen tulǵalarǵa azamattyq talap qoıýǵa quqyly. Eger qurylys kompanııasynyń basshysy qylmystyq jaýapkershilikke tartylǵan jaǵdaıda, klıentter keltirilgen múliktik jáne moraldyq zııandy óteýdi kináli tulǵadan talap ete alady. Úsh qaryz alýshyda turǵyn úı satyp alýǵa jumsalǵan qarajatty qurylys salýshydan óndirip alý týraly sot sheshimi bar ekeni belgili, - delingen habarlamada.

Bank 2025 jylǵy 31 tamyzdan bastap ıpotekalyq nesıe berý talaptarynyń qatańdaıtynyn da eske saldy. Zańnamalyq ózgeristerge sáıkes, bankter tek úleskerlerdiń aqshasyn tartýǵa ruqsaty jáne kepildik sharty bar nysandarǵa ǵana ıpoteka bere alady.

Eske salaıyq, buǵan deıin Qazaqstanda úlestik qurylystaǵy alaıaqtyq boıynsha 27 qylmystyq is tergelip jatqanyn habarlaǵanbyz. 

Atalǵan qylmystyq ister boıynsha 305 adam zardap shekken. Olar 3 mıllıard 200 mıllıon teńgeden astam soma shyǵynǵa batqan.