Otbasy bank 70 myń salymshyǵa 1,6 trln teńge jeńildetilgen ıpotekalyq qaryz beredi
ASTANA. KAZINFORM – Bıyl «Báıterek» holdıngi turǵyn úı qurylysyna shamamen 2,4 trln teńge somasynda qoldaý kórsetedi. Bul týraly holdıngtiń basqarma tóraǵasynyń birinshi orynbasary Bolat Aıdapkelov aıtty.
Byltyr da Báıterek holdıngi óziniń enshiles uıymdary – Qazaqstan turǵyn úı kompanııasymen jáne Otbasy bankpen birlesip, turǵyn úı qurylysyna jalpy 2,35 trln teńge somasynda qoldaý kórsetken.
– Qazaqstan turǵyn úı kompanııasynyń qarjy kózderi men naryqtyq qaryzdary esebinen turǵyn úı qurylysyn qoldaý somasy 707,5 mlrd teńgege jetti. Bul 3 mln sharshy metr turǵyn úıdi nemese 35,6 myń páterdi qoldanysqa berýge múmkindik berdi. El boıynsha kóppáterli turǵyn úıdi iske qosýdaǵy Qazaqstan turǵyn úı kompanııasynyń úlesi 22% kórsetti, – dedi B.Aıdapkelov Úkimettiń búgingi otyrysynda.
238,2 mlrd teńge kólemindegi oblıgatsııalyq qaryzdar naryqtyq sharttarmen tartylyp, óńirlerge baǵyttalǵan. Onyń ishinde jalǵa beriletin turǵyn úıge – 150,4 mlrd teńge (9,4 myń páter), ınjenerlik ınfraqurylymdy júrgizýge – 87,8 mlrd teńge bólingen.
Kredıttik turǵyn úıdi qarjylandyrý sheńberinde 140,2 mlrd teńgege ákimdikterdiń baǵaly qaǵazdary satyp alyndy. Osylaısha, qazirgi resýrstarmen naryqtyq qarajatty aralastyrý esebinen 1,8 mln sharshy metr nemese kezekte turǵandar úshin 23 myńǵa jýyq áleýmettik páter belgilengen baǵamen berildi.
Turǵyn úı qurylys jınaqtary júıesi boıynsha 2025 jyly Otbasy bank halyqqa jalpy somasy 1 trln 645 mlrd teńgege 77 148 qaryz bergen.
– 2026 jyly baspanaǵa muqtaj 70 myńnan astam otbasyna Otbasy banktiń barlyq baǵdarlamalary boıynsha jeńildetilgen ıpotekalyq kredıt arqyly 1 trln 630 mlrd teńgege ıpotekalyq qaryz berý josparlanyp otyr, – dedi B.Aıdapkelov.
Sondaı-aq ınjenerlik ınfraqurylymdy salý men jańǵyrtý úshin óńirlerge 29,3 mlrd teńge kóleminde naryqtyq qarajat baǵyttaldy, bul jylýmen jabdyqtaý, elektrmen jabdyqtaý jáne sý burý jobalaryn ýaqytyly iske asyrýǵa múmkindik berdi.
– Qazaqstan turǵyn úı kompanııasy úlestik qurylysqa kepildik berý tetigi men óz baǵdarlamalary sheńberinde 299,8 mlrd teńgege qurylys salýshylardyń jobalaryn qoldady, bul 10 myń úleskerdiń quqyqtaryn qorǵaýǵa jáne 1,5 myń páter salýǵa múmkindik berdi. Bıyl Qazaqstan turǵyn úı kompanııasy arqyly qoldaý somasy 700 mlrd teńgeden asyp, shamamen 2,2 mln sharshy metr turǵyn úı (30 myń páter) tapsyrylady, – dedi holdıng ókili.
Eske sala ketsek, byltyr rekordtyq kólemde turǵyn úı paıdalanýǵa berilgen.
Sondaı-aq 2025 jyly kezekte turǵan 14,5 myń adam baspanaly bolǵan.
