Otbasy bank 3000-nan astam jetim balaǵa baspana bóldi
ASTANA. KAZINFORM — Sońǵy eki jylda «jetim balalar jáne ata-anasynyń qamqorlyǵynsyz qalǵan balalar» sanatyna jatatyn 3189 qazaqstandyq Otbasy banktiń qoldaýymen turǵyn úı máselesin sheshti. Eger 2025 jyly 582 adam baspanamen qamtylsa, 2026 jyly bul kórsetkish bes esege jýyq ósti.
Memlekettik qoldaý sharalary aıasynda 2 274 adam jaldamaly turǵyn úımen qamtamasyz etilse, 740 turǵyn jyldyq 2% mólsherlememen jeńildetilgen ıpoteka arqyly jeke páterin satyp aldy. Al 175 azamatqa turǵyn úıdi jaldaý aqysynyń jartysyn sýbsıdııalaý túrinde qoldaý kórsetildi. Otbasy bank ulttyq damý ınstıtýty retinde baspana kezegin qysqartýmen qatar, azamattardyń quqyqtyq kepildikterin de kúsheıtip keledi.
Osy oraıda bank Ónerkásip jáne qurylys mınıstrligimen birlesip, «Turǵyn úı qatynastary týraly» zańǵa mańyzdy ózgerister engizdi.
2026 jylǵy 14 qyrkúıekten bastap bala asyrap alý nemese qamqorshylyq toqtatylǵan jaǵdaıda, azamat baspana kezegine qoıylǵan bastapqy kúnin saqtap qalady. Sondaı-aq bólinetin turǵyn úıdiń jalpy kóleminiń keminde 20%-y osy sanatqa beriledi. Mysaly, ákimdik 100 jaldamaly páter bólse, onyń 20-sy jetim balalarǵa tıesili. Budan bólek, jetim balalar baspana kezegine týǵan sátinen bastap qoıyla alady. 18 jasqa deıin ata-anasynan aıyrylǵandar úshin bul quqyq 29 jasqa deıin saqtalady, al áskerge shaqyrylǵandar úshin bul merzim qyzmet ótkerý ýaqytyna uzartylady.
Qazir turǵyn úı bólý úderisi tolyq avtomattandyrylǵan. Júıe azamattyń esepke qoıylǵan kúnin, basym sanatqa jatatynyn jáne tabys deńgeıin eskeredi. Adamnyń aralasýynsyz júzege asatyn bul protseste derekterdi tekserý úshin Otbasy bank 15 memlekettik derekter bazasymen ıntegratsııalanǵan.
Turǵyn úımen qamtamasyz etý tetiginiń túp-tamyrynda «turǵyn úı qoljetimdiliginiń baspaldaǵy» qaǵıdaty jatyr. Árkimniń qarjylyq jaǵdaıyna qaraı oǵan qolaıly qoldaý túri usynylady. Tabysy tómen azamattar jaldaý aqysyn sýbsıdııalaýǵa nemese jaldamaly turǵyn úı alýǵa ótinish bere alady. Al tabysy turǵyn úı qaryzyn tóleýge múmkindik beretin azamattarǵa jeńildetilgen ıpotekalyq nesıeler usynylady. Tabysty rastaý protsesi de avtomattandyrylǵan. Otbasy bank Eńbek resýrstaryn damytý ortalyǵymen birlesip arnaıy tsıfrlyq servıs ázirlep, iske qosty. Júıe azamattyń barlyq tabys kózderin anyqtap, olardy taldaıdy jáne otbasynyń ár múshesine shaqqandaǵy jıyntyq tabysty avtomatty túrde esepteıdi. Jalpaq tilge salsaq, azamattarǵa qosymsha anyqtamalar jınaýdyń qajeti joq.
Kim qandaı qoldaýǵa úmitker bola alady?
Qoldaý túrin anyqtaý kezinde eń tómengi kúnkóris deńgeıii eskeriledi. 2026 jyly onyń mólsheri — 50851 teńge. Jaldaý aqysyn sýbsıdııalaý úshin otbasynyń ár múshesine shaqqandaǵy sońǵy alty aıdaǵy ortasha tabys bir eń tómengi kúnkóris deńgeıinen, ıaǵnı 50851 teńgeden aspaýy tıis.
Jaldamaly turǵyn úı alý kezinde otbasy quramyna baılanysty túrli tabys shekteri belgilengen. Úsh jáne odan kóp adamnan turatyn otbasylar úshin árbir otbasy múshesine shaqqandaǵy tabys eki eń tómengi kúnkóris deńgeıinen aspaýy kerek. Máselen, úsh adamnan turatyn otbasy úshin jıyntyq tabystyń shekti mólsheri 305106 teńgege teń.
Otbasynda eki adam bolsa, onda árqaısysyna eń tómengi kúnkóris deńgeıi esepteledi. Mundaı jaǵdaıda otbasynyń jıyntyq tabysy 355 956 teńgeden aspaýy tıis. Al jalǵyz turatyn azamat úshin shekti tabys mólsheri 279 680 teńge.
Jyldyq 2% mólsherlememen jeńildetilgen ıpoteka arqyly turǵyn úı satyp alý úshin sońǵy alty aıdaǵy otbasynyń ár múshesine shaqqandaǵy ortasha tabys eń tómengi kúnkóris deńgeıinen, ıaǵnı 254 255 teńgeden aspaýy qajet.
Al 5% mólsherlememen beriletin jeńildetilgen turǵyn úı zaemdary boıynsha tabys shegi bir adamǵa 305 106 teńgeden aspaıdy.
Osylaısha, turǵyn úımen qamtamasyz etý júıesi azamattyń áleýmettik mártebesin ǵana emes, onyń qarjylyq múmkindigin de eskeredi.
Avtomattandyrylǵan bólý júıesi, arnaıy kvotalar men jańa zańnamalyq kepildikter jetim balalar men ata-anasynyń qamqorlyǵynsyz qalǵan azamattarǵa kórsetiletin kómekti barynsha ataýly, ashyq ári qoljetimdi etýge múmkindik beredi.
