Otbasy balanyń tulǵa bolyp qalyptasýynda qandaı ról atqarady
ASTANA. KAZINFORM – «Altyn alqa» ıegeri, OrkenLink startap jobasynyń jáne «Daryndy bala álemi» baspasynyń negizin qalaýshy Aınagúl Hamıtova ınklıýzıvti bilim berý, otbasy qundylyqtary jáne jas otbasylardy qoldaý máseleleri jóninde Kazinform tilshisine suhbat berdi.
Spıkerdiń aıtýynsha, qoǵamda ınklıýzııa uǵymy áli de tek erekshe bilim berý qajettiligi bar balalarmen shektelip túsindirilip keledi. Alaıda ınklıýzııa árbir balanyń qabiletine, áleýmettik jaǵdaıyna nemese oqıtyn mektebine qaramastan, sapaly bilim men damý múmkindikterine teń qol jetkizýi.
– Inklıýzıvti qoǵamda birde-bir bala júıeden tys qalmaýy tıis. Búginde biz daryndy balalarǵa arnalǵan mektepter men qarapaıym jalpy bilim beretin mektepter arasyndaǵy aıyrmashylyqty aıqyn kórip otyrmyz. Bul alshaqtyq bilim sapasynda, resýrstarda jáne damý múmkindikterinde baıqalady, – dedi Aınagúl Hamıtova.
Onyń aıtýynsha, ınklıýzıvti oqytýdy engizýdegi negizgi qıyndyqtar ol pedagogterdiń arnaıy daıarlyǵynyń jetkiliksizdigi, synyptaǵy oqýshy sanynyń kóptigi, ár balaǵa jeke kóńil bólýge ýaqyttyń azdyǵy jáne mektep ınfraqurylymynyń tolyq beıimdelmeýi.
Osy rette maman EdTech platformalardyń áleýetine toqtaldy.
– Qazirgi tańda otandyq jáne sheteldik EdTech platformalar jetkilikti. Bul resýrstardaǵy bilim bárine qoljetimdi. Alaıda biz olardy tolyqqandy paıdalanyp otyrǵan joqpyz. Tsıfrlyq platformalar arqyly oqýshylardyń oqý qarqynyn, qyzyǵýshylyǵy men álsiz tustaryn der kezinde anyqtap, jeke oqý traektorııasyn qurýǵa bolady. Bul muǵalimderdiń júktemesin azaıtyp, ár balaǵa derbes qoldaý kórsetýge múmkindik beredi, – dedi spıker.
Aınagúl Hamıtova qazirgi ýaqytta otandyq EdTech startap ázirlep jatqanyn aıtyp, kópbalaly ana retinde balalarynyń qarapaıym memlekettik mektepterde bilim alatynyn jetkizdi. Onyń pikirinshe, ınklıýzııany tıimdi iske asyrý úshin kadrlyq daıarlyq, tsıfrlyq sheshimder, mektepishilik komandalyq jumys jáne memlekettik deńgeıdegi júıeli saıasat qatar júrýi qajet.
Ata-analar men ustazdar ınklıýzııany qalaı qabyldaıdy?
Bul suraqqa jaýap bergen spıker ata-analar men pedagogterdiń kózqarasy árkelki ekenin atap ótti.
– Biri ınklıýzııany ár balaǵa teń múmkindik beretin ádiletti ári zamanaýı bilim berý qaǵıdasy retinde qabyldaıdy. Al endi bir bóligi ony qosymsha júkteme nemese oqý sapasyna keri áser etýi múmkin degen alańdaýshylyqpen qarsy alady, – dedi ol.
Aınagúl Hamıtovanyń aıtýynsha, tájirıbe kórsetkendeı, qarsylyqtyń negizgi sebebi ınklıýzııanyń ózinde emes, ony iske asyrýdaǵy qoldaýdyń jetkiliksizdiginde. Muǵalimderge naqty ádistemelik quraldar men ýaqyt jetispeıdi, al ata-analar balasynyń oqý úderisinde qandaı qoldaý alyp jatqanyn tolyq kórmeıdi.
– Osyǵan baılanysty júıeli aqparattandyrý men oqytý baǵdarlamalaryn engizý, mektepterde tıýtorlar, psıhologtar men arnaıy pedagogterdiń qoljetimdiligin arttyrý mańyzdy. Sondaı-aq EdTech platformalar arqyly oqýshylardyń damý dınamıkasyn ashyq kórsetip, ata-anamen keri baılanysty kúsheıtý qajet. Muǵalimderdiń júktemesi azaıyp, ınklıýzıvti tájirıbege ýaqyt pen resýrs bólingen jaǵdaıda ǵana ınklıýzııa shynaıy qoldaý retinde qabyldanady, – dedi ol.
Bala tárbıesinde otbasynyń orny qandaı?
Aınagúl Hamıtovanyń pikirinshe, otbasy balanyń tulǵa bolyp qalyptasýyndaǵy negizgi orta.
– Bala eń aldymen otbasynda ómirlik qundylyqtardy, qarym-qatynas mádenıetin jáne qoǵamǵa degen kózqarasyn qalyptastyrady. Munda basty qaǵıda – balaǵa senim, qoldaý jáne jaýapkershilikti teń dárejede berý. Sondaı-aq qazaq ulttyq pedagogıkasynda otbasynyń róli aıryqsha. Qazaq dástúrinde bala qoǵamnyń bolashaǵy, al ata-ana onyń tárbıesi men bilim alýyna jaýapty tulǵa retinde qarastyrylady, – dedi spıker.
Aınagúl Hamıtovanyń aıtýynsha, qazirgi kezde jastardyń otbasyǵa degen kózqarasy sanaly túrde ózgerip kele jatqanyn aıtty.
– Qazirgi jastar aldymen bilim alýǵa, kásibı damýǵa jáne jeke ósýge basymdyq beredi. Alaıda bul otbasy qundylyǵy joıyldy degen sóz emes. Ol tek jańa mazmunǵa ıe bolyp otyr, – dedi ol.
Memleket tarapynan jas otbasylarǵa qandaı qoldaý jetkiliksiz?
Spıkerdiń aıtýynsha, turǵyn úı baǵasynyń qymbattaýy, balabaqsha oryndarynyń tapshylyǵy, ata-analar men balalarǵa arnalǵan psıhologııalyq jáne medıtsınalyq kómektiń jetkiliksizdigi, sondaı-aq ıkemdi jumys kestesiniń bolmaýy – negizgi túıtkilder.
– Osy máseleler kezeń-kezeńimen sheshilse, bala tárbıesiniń sapasy da arta túsedi. Degenmen qandaı jaǵdaıda da ata-ana retindegi jaýapkershilikti umytpaý mańyzdy, – dep túıindedi Aınagúl Hamıtova.
Eske sala keteıik, Qazaqstanda ınklıýzııa salasynda sarapshylar daıyndaıtyn ortalyq ashyldy.
Sonymen qatar Astanalyq oqýshylar ınklıýzııany damytýǵa arnalǵan jańa robot qurastyryp jatqanyn jazǵanbyz.