Otbasy aptalyǵy: bala densaýlyǵy men qaýipsizdigine nazar aýdarylady
ASTANA. KAZINFORM — Otbasy kúnine arnalǵan aptalyq «Deni saý urpaq: birge ósemiz» taqyrybynda ótip jatyr, dep habarlaıdy Mádenıet jáne aqparat mınıstrliginiń baspasóz qyzmeti.
Qazaqstanda Otbasy kúnine arnalǵan aptalyq jalǵasyp jatyr. Aptalyqtyń tórtinshi kúngi taqyryby — «Deni saý urpaq: birge ósemiz».
— Búgin óńirlerde ata-analarǵa bala densaýlyǵy men damýy týraly paıdaly aqparat beretin tanymdyq kezdesýler ótkizý josparlanǵan. Mamandar balanyń erte jastaǵy damýy, durys tamaqtanýy, uıqy tártibi, kóńil kúıi, sondaı-aq balabaqshaǵa beıimdelýi týraly keńes beredi, — delingen habarlamada.
Mektepke deıingi bilim berý uıymdarynda ata-analar úshin ashyq esik kúnderi ótedi. Kezdesýler barysynda balalardyń qaýipsizdigi, mekemedegi kún tártibi, ata-analar men tárbıeshiler arasyndaǵy durys baılanys ornatý máseleleri sóz bolady.
Sonymen qatar medıtsınalyq mekemeler men jastar resýrstyq ortalyqtarynda reprodýktıvti densaýlyq jáne shańyraq kóterýdi sanaly túrde josparlaý týraly aıtylady.
Aptalyq aıasynda tsıfrlyq qaýipsizdik máselesi de nazardan tys qalmaıdy. «Telefondaǵy otbasy» jobasy barysynda ata-analar men balalarǵa ınternettegi qaýipsizdik, kıberbýllıng, tsıfrlyq táýeldiliktiń aldyn alý, jeke derekterdi qorǵaý jáne tsıfrlyq keńistikte jeke shekarany saqtaý jóninde aqparat beriledi.
Osyǵan deıin Qazaqstanda Otbasy kúnine oraı qandaı is-sharalar ótetinin jazǵanbyz.
