«Otaý-TV» otandyq jer serigine kóp balaly otbasylar men zeınetkerlerdi jeńildikpen qosý jolyn qarastyrý qajet - Májilis depýtaty
ASTANA. 28 mamyr. QazAqparat - «Otaý-TV» otandyq jer serigine aýyl turǵyndarynyń áleýmettik jaǵynan álsiz toptaryn, kóp balaly otbasylar men zeınetkerlerdi jeńildikpen qosý joldaryn qarastyrý kerek.
Bul týraly búgin Parlament Májilisinde aqparattyq kommýnıkatsııa tehnologııalary salasyn damytý qorytyndylary taqyrybynda ótken Úkimet saǵatynda Ekonomıkalyq reforma jáne óńirlik damý komıtetiniń tóraǵasy, depýtat Seıitsultan Áıimbetov aıtty.
«Ulttyq teleradıo habarlaryn taratýdy damytýǵa qolaıly jaǵdaı jasaý úshin qazirgi ýaqytta aýmaqtardy 100 paıyz qamtýǵa eseptelgen jáne kez kelgen eldi mekenderde qyzmetke qosylýǵa múmkindik beretin «Otaý-TV» otandyq spýtnıktik habar taratýdyń jańa jelisi paıdalanýǵa berilgenin atap ótý qajet. Osyǵan baılanysty respýblıkanyń barlyq oblys ortalyqtarynda Satý ortalyqtary qurylǵan. Alaıda, jelige qosý úshin qajetti abonettik qabyldaý men montajdaý jabdyqtaryn jetkizýdi dılerlik jeliler arqyly júzege asyrýǵa múmkindik berip qoıǵan», - deıdi depýtat S. Áıimbetov.
Depýtattyń aıtýynsha, «Otaý-TV» otandyq jer serigin engizýge qatysty jabdyqtardyń baǵasy ártúrli. Máselen, spýtnıktik habar taratý jelisine qosý úshin qajetti abonettik qabyldaý jabdyqtary, otbasy bıýdjeti úshin 25 000 - 28 000 teńge bolady.
«Sondyqtan osy jelige aýyl turǵyndarynyń áleýmettik jaǵynan álsiz toptaryn, onyń ishinde kóp balaly otbasylary men zeınetkerlerdi jeńildikpen qosý múmkindigin qarastyrýdy usynamyz», - deıdi S. Áıimbetov.
