Otardaǵy áskerı bólimde sarbaz soqqyǵa jyǵylyp, jaǵy synǵan
ASTANA. KAZINFORM – Boryshyn ótep júrgen qatardaǵy jaýynger serjanttan álimjettik kórgen. Bul jóninde zardap shekken sarbazdyń týystary vıdeo túsirip, áleýmettik jelige jarııalady.
Jaraqat alǵan áskerı qyzmetshiniń ápkesi taratqan aqparatqa sensek, sarbazdy serjant temirmen urǵan. Saldarynan jaǵy synǵan. Sodan soń, ony Almatyǵa aparyp, aýrýhanada ota jasatqyzǵan. Alaıda kúrdeli otadan keıin em-dom qabyldaýǵa múmkindik berýdiń ornyna qaıtadan Otarǵa aparyp, rota komandıriniń úıinde ustapty.
Onda medıtsınalyq jáne sanıtarlyq kútim bolmaǵan. Birneshe kún baılanysqa shyqpaǵan sarbazdy týystary Otarǵa izdep barǵanda, osyndaı jaıttardyń betin ashqan.
– Tekserý barysynda dárigerler inimniń jaǵyna ota durys jasalmaǵanyn anyqtady. Sol sebepti, ony Almatydaǵy áskerı gospıtalge jiberdi. Qazir sonda em qabyldap jatyr, – dep jazdy sarbazdyń ápkesi áleýmettik jelide.
Týystary túsirgen vıdeoda zardap shekken sarbaz ózin soqqyǵa jyqqan serjanttyń atyn da ataıdy. Biz bul serjantqa habarlastyq.
– Atalǵan sarbaz taratqan aqparat jalǵan. Men ony urmadym, soqpadym. Ol kúni demalysta edim. Jumysqa shyqpadym. Áriptesterimniń arasynda kýágerler bar, jumysta bolmaǵanymdy dáleldeı alamyn. Zardap shekken sarbaz ózi sekildi jaýyngermen kelispeı qalyp, jaq tusynan soqqy alǵanda, jaǵy synyp ketken. Sarbazdardyń arasynda bolǵan jaǵdaı, – deıdi serjant.
Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdedi.
– Oqıǵa saldarynan áskerı qyzmetshilerdiń biri jaq súıeginen jaraqat aldy. Zardap shekken áskerı qyzmetshi Almaty qalasyndaǵy Áskerı-klınıkalyq gospıtalǵa jatqyzyldy. Oǵan barlyq qajetti bilikti medıtsınalyq kómek kórsetilýde, densaýlyq jaǵdaıy áskerı dárigerlerdiń turaqty baqylaýynda, – delingen vedomstvo jaýabynda.
Qazir bul jaıtqa baılanysty sotqa deıingi tergeý júrip jatyr. Atalǵan basqarma oqıǵaǵa qatysty barlyq tulǵalardyń áreketine quqyqtyq baǵa beriledi dep sendirdi.
Sonyń ishinde quqyqbuzýshylyq jóninde der kezinde joǵary basshylyqqa baıandamaǵan jáne medıtsınalyq kómekti uıymdastyrýda kemshilikter jibergen laýazymdy tulǵalar da bar.
– Tergeý sharalary kezeńinde áskerı bólimniń birqatar laýazymdy tulǵalary qyzmettik mindetterin atqarýdan ýaqytsha shettetildi. Tergeý qorytyndysy boıynsha kináli tulǵalar Qazaqstan Respýblıkasynyń zańnamasyna sáıkes jaýapkershilikke tartylady, – delingen resmı túsiniktemede.
Aıta keteıik, buǵan deıin Óskemendegi áskerı bólimderdiń birinde merzimdi qyzmettegi sarbaz kóz jumǵany jóninde jazǵanbyz.