Otarda jaǵy synǵan sarbaz isi: boryshtas jaýyngerdiń ústinen qylmystyq is qozǵaldy

ASTANA. KAZINFORM – Otardaǵy áskerı bólimde soqqyǵa jyǵylyp, jaǵy synǵan sarbaz Esbol Qapardyń isi boıynsha kúdikti anyqtaldy. QR Qorǵanys mınıstrligindegi derekkózimizdiń málimetinshe, jaraqat alǵan jaýyngermen birge boryshyn atqaryp júrgen basqa bir sarbazdyń ústinen qylmystyq is qozǵalǵan.

Kúdiktiniń Qyzylordada turatyn anasy ulyn Otardaǵy áskerı bólimge izdep barǵan. Alaıda kazarmadan balasyn tappaıdy. Onyń túsirgen vıdeosyn jýrnalıst Gúlmıra Ábiqaı áleýmettik jelidegi paraqshasynda jarııalady.

– «Eki sarbaz tóbelesti» degen aqparat boıynsha, ekinshi sarbazdyń anasymyn. Otar qalasyna keldim de, birden kazarmaǵa bardym. Kazarmada balam joq. Al jaǵy synǵan sarbazdyń ata-anasy kelse, ulyn páterden tabady. Bul ne degen sumdyq?! Biz balalarymyzdy áskerge áskerı boryshyn óteýge jibergen edik. Sottalý úshin ne osylaı taıaq jeý úshin jiberdik pe?! Muny qalaı túsinýge bolady?! Ne isteýge bolady?! – deıdi aıyptalýshy sarbazdyń anasy.

Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi.

Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.

Sonymen qatar, buǵan deıin Otardaǵy áskerı bólimde jaǵy synǵan sarbazdyń jaǵdaıy týraly jazǵanbyz.

Adam quqyqtary jónindegi ýákil Otarda jaǵy synǵan sarbazǵa qatysty pikir bildirdi. 

Qorǵanys mınıstrliginiń baspasóz qyzmeti osy oqıǵaǵa baılanysty úsh komandır men orynbasary qyzmetinen bosatylǵanyn málim etti.