Otarda jaǵy synǵan sarbaz: Áskerı bólim komandırinen bastap úsh laýazymdy tulǵa qyzmetinen ketti
ASTANA. KAZINFORM — Gvardeısk garnızonyndaǵy áskerı bólimderdiń birinde merzimdi qyzmet sarbazyna dene jaraqatyn keltirý faktisi boıynsha qylmystyq is qozǵalyp, úsh komandır men orynbasary qyzmetinen bosatyldy, dep habarlaıdy Qorǵanys mınıstrliginiń baspasóz qyzmeti.
Qajetti tergeý amaldary júrgizilip jatyr. Budan basqa laýazymdy adamdardyń áreketterine quqyqtyq baǵa berilip, qyzmettik tekserý júrgizildi.
— Naqty aıtqanda kadrlyq sheshim qabyldanyp, basshylyq quramyndaǵy tórt laýazymdy tulǵa — áskerı bólim komandıri, onyń tárbıe jáne ıdeologııalyq jumys jónindegi orynbasary, batalon komandıri jáne rota komandıri qyzmetterinen bosatyldy. Áskerı bólim komandıriniń orynbasary — shtab bastyǵyna, batalon komandıriniń orynbasaryna jáne onyń tárbıe jumysy jónindegi orynbasaryna qyzmettik áreketke sáıkes emes dep eskertý jarııalandy. Birqatar ofıtser men serjanttarǵa qatań tártiptik jazalar qoldanyldy, — delingen mınıstrlik taratqan aqparatta.
Qabyldanǵan sharalar atqaryp otyrǵan laýazymyna qaramastan, derbes jáne bultartpas jaýapkershilik qaǵıdatyn kórsetedi.
Qazaqstan Respýblıkasynyń zańyna sáıkes barlyq mán-jaıǵa túpkilikti qorytyndy men quqyqtyq baǵa tergeý nátıjeleri boıynsha beriledi.
Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi. Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.
Sonymen qatar, buǵan deıin Otardaǵy áskerı bólimde jaǵy synǵan sarbazdyń jaǵdaıy týraly jazǵanbyz.
Budan buryn Adam quqyqtary jónindegi ýákil Otarda jaǵy synǵan sarbazǵa qatysty pikir bildirdi.