Otarda Qarýly kúshterdiń úzdik serjanty tańdalýda
«Baıqaý 6 atalym boıynsha ótkiziledi. Óńirlik qolbasshylyqtyń (ásker teginiń, Qarýly kúshter bas basqarmasynyń) úzdik serjanty, brıgadanyń (bazanyń) úzdik serjanty, batalonnyń (dıvızıonnyń) úzdik serjanty, rotanyń (batareıanyń) úzdik serjanty, vzvodtyń úzdik serjanty, bólimsheniń (tanktiń, jaýyngerlik mashınanyń, eseptoptyń, qondyrǵynyń) úzdik komandıri», delingen habarlamada.
Serjanttar «Qaısar» - áskerı-sporttyq saıys, «Barys» - armııalyq qoıan-qoltyq urys, «Mergen» - atys daıarlyǵy, «Baǵdar» - áskerı topografııa boıynsha saıys, «Bilimpaz» - áskerı-kásibı saıys, «Seri» - kórkem ádebıet saıysy, «Ázirlik» jáne baǵynysty serjanttar quramynyń daıyndyǵyn baǵalaý «Top basshy» nomınatsııasy boıynsha baq synasady.
Konkýrsqa barlyǵy 90-nan asa adam qatysady. Baıqaý jeńimpazdaryn anyqtaý barlyq jattyǵýlardy (normatıvterdi, tapsyrmalardy) oryndaý barysynda jınalǵan barynsha upaı sany negizinde júzege asyrylady.
«Jalpy armııalyq konkýrs jyl saıynǵy bolyp tabylady. Bıylǵy jyly 7-shi ret ótkizilip otyr. Búgin «Qaısar» áskerı-sporttyq jarysyn ótkizdik. Oǵan 100 metrge júgirý, beltemirge tartylý, dáldikke F-1 granatasyn laqtyrý, sondaı-aq, «Ázirlik» pen «Bilimpaz» baıqaýlary kiredi», - dedi «Ońtústik» óńirlik qolbasshylyǵynyń serjanty shtab-serjant Bolat Jaısanbaev.
QR Qarýly kúshteriniń úzdik serjanty ataǵy úshin baıqaý jeńimpazdary sertıfıkattar jáne baǵaly syılyqtarmen marapattalady. Sonymen qatar, olarǵa joǵary laýazymǵa ilgerileý artyqshylyǵy beriledi.
Jalpy armııalyq baıqaýǵa ázirlikti qamtamasyz etý úshin oryndarda oqý jyly boıy Qarýly kúshterdiń áskerı bólimderi men mekemeleri, óńirlik qolbasshylyqtary, ásker tekteri men túrleri aýqymynda úzdik serjanttardy aıqyndaý úshin kezeń-kezeńdik saıystar uıymdastyrylyp, ótkiziletinin aıta keteıik. 
