Otar mańynda tikushaqty izdestirý-qutqarý jumystary júrgizilip jatyr
ASTANA. KAZINFORM — Oqıǵa ornyna dereý QR TJM-niń kúshteri men quraldary, sonyń ishinde «Qazavıaqutqarý» tikushaǵy jumyldyryldy. Bul týraly TJM baspasóz qyzmeti habarlady.
— 25 shildede Almaty oblysynyń TJD kezekshi bólimine úsh ekıpaj múshesi bar Qorǵanys mınıstrliginiń tikushaǵy Lýgovoı eldi mekeninen ushyp shyǵyp, Otar aýmaǵynda baılanysqa shyqpaı qalǵany týraly habar tústi.
Oqıǵa ornyna dereý QR TJM-niń kúshteri men quraldary, sonyń ishinde «Qazavıaqutqarý» tikushaǵy jumyldyryldy.
Іzdestirý-qutqarý jumystaryna TJM bólimsheleri, Apattar medıtsınasy ortalyǵy, Respýblıkalyq jedel-qutqarý jasaǵy men TJM avıatsııasy jumyldyryldy. Barlyǵy 100-den astam adam men 15-ke jýyq tehnıka, onyń ishinde avıatsııa men ushqyshsyz ushý apparattary tartyldy, — delingen mınıstrlik habarlamasynda.
Іzdestirý-qutqarý jumystary jalǵasyp jatyr.
Aıta ketelik 2025 jylǵy 25 shildede Almaty oblysynda josparly ushý barysynda Qarýly Kúshteri Áýe qorǵanysy kúshteriniń EC-145 tikushaǵy radardan joǵalyp ketkeni týraly jazǵan edik.