«Otar» áskerı bazasy Halyqaralyq Armııa oıyndaryn ótkizýge daıyn
Bul týraly QR Qorǵanys mınıstrliginiń baspasóz qyzmeti habarlady.
Ázirge 18 eldiń áskerı qyzmetshileri baıqaýǵa qatysatyndaryn rastady. Olar: Ázerbaıjan, Armenııa, Bangladesh, Belarýs, Venesýela, Grekııa, Zımbabve, Úndistan, Iran, Qazaqstan, Qytaı, Qyrǵyzstan, Mońǵolııa, Reseı Federatsııasy, Taıland, Tájikstan, Ózbekstan jáne OAR. Sondaı-aq, oıyndardyń bastalý qarsańynda Egıpet pen Pákistannyń baqylaýshylary qosylady.
«Oıyndardyń negizgi maqsaty memleketter arasyndaǵy halyqaralyq yntymaqtastyqty nyǵaıtý, jaýyngerlik daıyndyq tájirıbelerimen almasý, jańa qarý-jaraqtardy tanystyrý jáne jeke quramdy oqytý. 40-shy áskerı bazada árbir qatysýshynyń dostyq pen ózara qurmet aıasynda óz kásibı daǵdylary men jaýyngerlik sheberligin laıyqty kórsete alýy úshin bar jaǵdaıdy jasaýǵa tyrystyq», - deıdi Qazaqstan Respýblıkasy Qarýly Kúshteri Qurlyq áskerleriniń bas qolbasshysy Murat Bektanov. 
«Artıllerııadan oq atý sheberleri» saıysynda ár memleket atynan 21 adamnan quralǵan komanda qatysýy tıis. Komanda quramynda 5 adamnan quralǵan 3 mınomet toby bolýy qajet. Saıysty ótkizý úshin árbir komandaǵa kópnysanaly jeńil saýytty tartqysh (MTLB), avtomattar, mına atqyshtar men granata atqyshtar beriledi.
«Mergender shebi» saıysynda ár memleketten 11 adamdyq komanda qatysady. Konkýrsty ótkizý úshin komandalarǵa «Aselsan» túngi nysanasy men optıkalyq nysanasy bar Dragýnov mergendik vıntovkalary beriledi.
«Ushqyshsyz ushý apparaty toptarynyń saıysynda» árbir memleket 10 adamnan quralǵan komandasyn baıqaýǵa qosady. Baıqaýdy ótkizý úshin komandalarǵa optıkalyq-elektrondyq paıdaly júktememen jáne ishten janatyn qozǵaltqyshpen jabdyqtalǵan, qozǵalysynyń radıýsy 1000 shaqyrymǵa jetetin ushaq tárizdes UUA kesheni (qysqa qashyqtyqta) jáne optıkalyq-elektrondyq paıdaly júktememen jáne elektrli qozǵaltqyshpen jabdyqtalǵan, qozǵalysynyń radıýsy 40 shaqyrymǵa jetetin ushaq tárizdes UUA kesheni beriledi.
Atap ótken jón, Qazaqstan Halyqaralyq Armııa oıyndarynyń qatysýshylaryn ekinshi ret qabyldap otyr. Komandalardyń qatysýshylarynyń jaıly turý úshin bar jaǵdaı jasalǵan, tamaqtaný ratsıony qonaqtardyń ashanasyna barynsha beıimdelgen. Bıylǵy baıqaýdy qazaqstandyqtar QR Qorǵanys mınıstrliginiń saıtyndaǵy onlaın-translıatsııa arqyly tamashalaı alady.
Eske sala ketsek, ótken jyly Qazaqstan Qarýly Kúshteriniń quramasy Halyqaralyq Armııa oıyndaryn jeńispen aıaqtaǵan edi. Jalpykomandalyq esepte elimizdiń áskerı qyzmetshileri Azııa, Eýropa, Afrıka jáne Latyn Amerıkasynyń 19 memleketinen jınalǵan 120 áskerı komanda arasynda ekinshi oryn aldy. Birinshi oryndy Reseı ıelense, úshinshi oryndy Qytaı komandasy enshilegen edi.
