«Otar» 40-shy áskerı bazasynda QR Prezıdenti - Qarýly Kúshterdiń Joǵarǵy Bas Qolbasshysynyń qatysýymen áskerı parad ótti

Bul týraly Aqordanyń baspasóz qyzmetinen málim etti.

Qurlyq áskerleriniń Bas qolbasshysy general-leıtenant Murat Maıkeev Qazaqstan Prezıdentine áskerdiń paradqa daıyndyǵy týraly baıandady.

Memleket basshysy óz sózinde áskerı qyzmetshilerdi, ardagerler men barsha qazaqstandyqtardy Otan qorǵaýshy kúnimen quttyqtady.

Nursultan Nazarbaev Qazaqstan armııasy dalalyq jerlerde jyl saıyn jedel jáne áskerı daıyndyq boıynsha 250-den astam is-shara ótkizetinine toqtaldy.

- Áskerı parad barlyq osy daıyndyq is-sharalarynyń sharyqtaý shegi bolyp tabylady. Bul Qazaqstan armııasy áskerı bólimsheleriniń kásibı mashyǵynyń, úılesimdiligi men múmkindikteriniń is júzindegi kórinisi. Búgin armııa bólimsheleri Qurlyq áskerleri men Áýe qorǵanysy kúshteri jaraqtanǵan zamanaýı qarý-jaraqty qoldanýdaǵy óz sheberlikterin kórsetetin bolady. Áskerı paradqa 7 myń áskerı qyzmetshi, 400-den astam áskerı tehnıka, 80 ushaq jáne tikushaq qatysady. Bul - bizdiń asa aýqymdy jattyǵýymyzdyń biri. Sonymen qatar, Kaspıı teńizi aılaǵynda Qazaqstan Áskerı-teńiz kúshteriniń kemeleri jaýyngerlik atys úlgisin kórsetedi. Bul kúni, 7 mamyrda, sardarlar men sarbazdar naǵyz patrıottar jáne óz isiniń sheberleri ekendikterin is júzinde dáleldeıdi, olardyń qýatty jáne aıbyndy estiletin urany: «Qýatty armııa - qýatty Qazaqstan!», - dedi Qazaqstan Prezıdenti.

Dástúrli áskerı parad kez kelgen armııanyń daıyndyǵynyń asa qajetti quramdas bóligi bolyp sanalady. Búgingi áskerı paradtyń ereksheligi - sarbazdar men sardarlardyń áskerı mashyǵy men kásibı sheberlikterin, Qazaqstan armııasy jabdyqtalǵan qarý-jaraq pen áskerı tehnıkanyń naqtyly qoldanylýyn is júzinde kórsetýdiń múmkindigin júzege asyrý.

Qurlyq áskerleri men Áýe qorǵanysy kúshteri zymyrandar atýdy, bombalaýdy, qarý-jaraqtyń barlyq túrinen jaýyngerlik atysty júzege asyrdy.

Áskerı áýe kúshteri maıdandyq jáne armııalyq ushaqtar men tikushaqtardan aspanda áýe urysyn júrgizdi. «Jetisý» jáne «Suńqar» ushqyshtar toby joǵary deńgeıde ushý ónerin kórsetti.

Jattyǵýda Áýe qorǵanysy kúshteriniń áýe shabýylyna qarsy qorǵanysyn S-125 zenıttik-zymyrandyq kesheni kórsetti. Ol basqarylatyn zenıttik zymyrandarmen áýede kórsetilgen nysanalardy kózdep atýdy júzege asyrdy.

Áskerı parad barysynda Zymyrandyq ásker jáne artıllerııa óz zeńbirekteri­ - «Tochka-Ý» taktıkalyq zymyrandyq kesheni, «Grad» jáne «Prıma» dúrkin atylys zymyrandyq júıesi, MSTA-B jáne D-30 zeńbirekteri, «Solntsepek» aýyr otshashý zymyrandyq júıesi, «Shtýrm-S» tankige qarsy zymyrandyq kesheni jáne t.b. múmkindikterin kórsetti.

Paradqa qatysqan toptar quramyna Qarýly kúshter, áskerı oqý oryndary, ІІM ishki áskerleri, UQK Shekara qyzmeti, Tótenshe jaǵdaılar mınıstrligi bólimsheleri, sondaı-aq Respýblıkalyq ulannyń rásim batalony kirdi.

Memleket basshysy áskerı parad aıaqtalǵan soń jaýyngerlik ózara is-qımyldyń joǵary deńgeıin kórsetý arqasynda búkil elimiz Qazaqstannyń áskerı qaýipsizdigin laıyqty qamtamasyz etýdiń kýási bolǵanyn atap ótti. Ol Qarýly kúshterimiz azamattardyń tatýlyǵy men tynyshtyǵyn qorǵap turǵanyna toqtaldy.

Sonymen qatar, Nursultan Nazarbaev Qorǵanys mınıstri Ádilbek Jaqsybekov jáne Qarýly kúshter generalıteti ókilderimen birge otandyq kásiporyndardaǵy jańa jáne jańǵyrtylǵan áskerı tehnıka úlgilerimen tanysty. Qarý-jaraq kórmesin «Qazaqstan ınjınırıng» Ulttyq kompanııasy» AQ quramyna kiretin Qazaqstannyń qorǵanys-ónerkásip kesheni kásiporyndary uıymdastyrdy.

Qazaqstan Prezıdentine áskerı, azamattyq jáne qosarly maqsattaǵy arnaıy tehnıkalar, sonyń ishinde shtabtyq, jaýyngerlik, medıtsınalyq, izdestirý-qutqarý mashınalary, radıorelelik stansa, qarly-batpaqty jerlerge arnalǵan «Tulpar» mashınasy, Qazaqstanda qurastyrylatyn ES-145 tikushaǵy, ushqyshsyz ushatyn apparattar úlgisi jáne qarý-jaraq, tehnıka men kıim-keshektiń ózge de túrleri kórsetildi.

Kórmeni aralap shyqqannan keıin Joǵarǵy Bas Qolbasshy áskerı paradqa qatysqan komandalyq qurammen jáne qatysýshylarmen áńgimelesti. Olardy Otan qorǵaýshy kúnimen taǵy da quttyqtap, joǵary kásibı jáne áskerı daıyndyǵy úshin rızashylyǵyn bildirdi. Nursultan Nazarbaev Qazaqstan sardarlary árdaıym patrıottyqtyń etalony bolyp, jas urpaqqa úlgi bolýy kerektigin atap ótti.