Otanymyzdyń bizdi umytpaǵany biz úshin mańyzdy - ardagerler
Bolashaqqa beıbit ómir syılap, Jeńisti jaqyndatqan ardagerler «Jeńis kúni» degen uǵymnyń qanshalyqty qasterli ekenin jas urpaq úshin taǵy bir eske saldy, dep habarlaıdy QazAqparat tilshisi. 
Polkovnık Grıgorıı Mıhaılov - bul kúnde 91 jastaǵy ordager. Ol maıdanǵa 15 jasynda attanǵan. 25 jyl ásker qatarynda qyzmet etken. Onyń 10 jylyn Qytaıda ótkizgen. Eren erligi men qyzmeti úshin túrli orden, medaldarmen nagradtalǵan.
«Biz, ardagerler kópti kórdik. Biz baqyttymyz. Biz jaýdy jeńdik, Otanymyzdy qorǵadyq, tiri qaldyq. Jeńis kúni biz maıdan dalasynda qyrshyn ketken, soǵystan keıin osy kúnge jete almaǵan 8 mln baýyrymyzdy eske túsiremiz. Otanymyzdyń bizdi osylaı eskergeni biz úshin mańyzdy», - dedi ardager Grıgorıı Mıhaılov.
Otan soǵysy ardagerleriniń biri Leonıd Gırsh 17 jasynda maıdanǵa óz erkimen attanǵan. Soǵys alańynda bastan-aıaq boldy, Berlındi alýǵa qatynasqan.
«Men úshin Jeńis kúni qasıetti mereke. Adamdar muny umytpasa, soǵys týraly estelikter umytylmaıdy. Men maıdan dalasynan tiri oraldym, qanshama baýyrym soǵysta qaza taýyp, qanshasy soǵystan keıin de uzaq ómir súre almady. Jeńis kúni men úshin qaza tapqandar men aman qalǵandardy eske alatyn kún. Qazaqstanda ardagerlerge kóp kóńil bólinip keledi. Biraq, 9 mamyr kúninen basqa ýaqytta da umytylmasaq deımiz», - dedi ardager Leonıd Gırsh.
Natsıstik Germanııamen soǵys maıdan dalasynda ǵana emes, tylda da júrip jatty. Sondyqtan, 9 mamyr Eńbek ardagerleri úshin de mańyzdy mereke. 
«UOS qaharmandaryn umytpaı, olardyń erligin urpaqtan urpaqqa jetkizý mańyzdy. Eń bastysy densaýlyq pen tynyshtyq bolsyn. Álemde qýanysh ornap, beıbitshilik bolsyn. Bizdiń jaǵdaımyzdy jasap otyrǵan Otanymyzdy, bir-birilerińizdi súıińizder», - deıdi UOS ardageriniń jesiri, tyl eńbekkeri Raısa Rahmatýllına.
Soǵys bastalǵanda ákesi Shaımerdendi maıdanǵa alyp ketken Kúlpán Shaımerdenova anasynyń 4 balamen qalyp, balalyq shaq degendi bilmeı óskenin aıtyp berdi.
10 jasynan eńbekke aralasqan Kúlpán Shaımerdenova traktor aıdaýdy úırenip, ferma úshin otyn tasyp, aǵash jarǵan, áıeldermen birdeı eńbek etken.
«Kerosın bolmady. Tuz, nan joq, orylǵan bıdaıdan qara nan pisirip jeıtin edik. Barlyǵy bir-birimen sanaspaı kún demeı, tún demeı eńbek etti. Ashyqsaq ta, tońsaq ta maıdan dalasyna qolymyzdan kelgendi jiberdik. Barlyǵymyzdyń maqsatymyz jaýdy jeńý boldy. 9 mamyr degende, men sol surapyl kúnderdi eske túsiremin», - deıdi Kúlpán apaı.
QR Eńbek jáne halyqty áleýmettik qorǵaý mınıstrliginiń málimeti boıynsha, búgingi tańda elimizde 2 776 UOS ardageri jáne múgedegi bar, 157 679 eńbek ardageri, kontslagerdiń sol kezdegi kámeletke jetpegen 487 tutqyny turady. Almaty qalasynda 670 bastaýysh ardagerler uıymy jumys isteıdi.
