Otanshyl kadrlardy basshylyq laýazymdarǵa taǵaıyndaımyz — Toqaev

ASTANA. KAZINFORM — Aldymyzda aýqymdy mindetterdi keler bes jylda oryndaýymyz kerek. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

— Men búgin Úkimet jumysynyń basty baǵyttaryn aıqyndap berdim. Bul — iri ınfraqurylym jobalary, tsıfrlandyrý jáne jasandy ıntellekt, ıadrolyq energetıkany damytý, agroónerkásip keshenin nyǵaıtý jáne ınvestıtsııa tartý máseleleri. Ekonomıkamyz damyp jatyr. Biraq onyń qarqyny oıdaǵydaı emes. Aldymyzda aýqymdy mindetter tur. Ony aldaǵy bes jylda oryndaýymyz kerek, — dedi Qasym-Jomart Toqaev.

Prezıdenttiń aıtýynsha, elimizge, eń aldymen, bilikti jáne el múddesin oılaıtyn otanshyl kadrlar kerek.

— Dál osyndaı mamandardy taýyp, olardy basshylyq laýazymdarǵa taǵaıyndaımyz. Búgin biz elimizdiń 2024 jylǵy damý nátıjesin qaradyq. Qordalanǵan máselelerdi talqylap, aldaǵy mindetterdi aıqyndadyq. Basty maqsat — azamattardyń ál-aýqatyn arttyrý. Aldaǵy jospardyń bárin sapaly oryndaý qajet. Sóz sońynda taǵy da atap ótkim keledi: bizge naqty nátıje kerek. Nátıje bolsa ǵana damý bolady, — dedi Memleket basshysy.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.

Memleket basshysy 2024 jyldy elimiz oń kórsetkishtermen aıaqtaǵanyn aıtty. 

Budan bólek Prezıdent batys aımaqtaǵy elektr jelisi Biryńǵaı elektrenergetıkalyq júıemen birigýi kerek ekenin aıtty.