Otanǵa degen súıispenshilik jastardyń basty baǵdaryna aınalýy tıis - QR Prezıdenti

NUR-SULTAN.QazAqparat - Jasampazdyq, beıbitshilik pen kelisim, halqymyzdyń birligi, Otanǵa degen súıispenshilik jáne bárimizge ortaq taǵdyr joly - bizdiń halqymyzdy biriktiretin qundylyqtar.

Bul qundylyqtar - jastardyń basty baǵdaryna aınalýy tıis. Bul týraly QR Prezıdenti Qasym-Jomart Toqaev Qaraǵandy oblysynda ótip jatqan «Aıbyn» respýblıkalyq áskerı-patrıottyq jastar jıynynda aıtty, dep habarlaıdy QazAqparat Aqordanyń twitter-degi málimetterine súıene otyryp.

«Otanymyz - Máńgilik eldiń bedelin arttyra berý - Senderge artylǵan zor úmit. Sondyqtan, Jastarymyz ulttyq qundylyqtarymyzǵa adal bolyp, Qazaqstannyń jetistikterin eseleı beredi dep men kámil senemin. Áskerı-patrıottyq qozǵalystyń basty maqsaty - Ózderińiz sııaqty jalyndy jastardyń basyn qosyp, el damýyna qajetti mańyzdy jumystarǵa belsene aralastyrý, kúsh jumyldyrý. Otan úshin aıanbaı eńbek etý jáne ol barshamyzǵa ortaq maqsat», - dedi Memleket basshysy.