«Otanǵa barar jol»: Sheteldegi qandastarǵa arnalǵan baıqaý qalaı ótkiziledi

NUR-SULTAN. QazAqparat – Halyqaralyq bilim berý korporatsııasynyń birinshi prorektory Qaıyrjan Meńdiǵalıev sheteldegi qandastarǵa arnalǵan «Otanǵa barar jol» baıqaýy qalaı ótkiziletindigin túsindirdi, dep habarlaıdy QazAqparat tilshisi.

«Halyqaralyq bilim berý korporatsııasy HBK Baqylaý keńesiniń tóraǵasy Aıǵazy Qusaıynov atynan QR azamaty bolyp tabylmaıtyn, biraq ulty qazaq bolatyn azamattar úshin «Otanǵa barar jol» baıqaýyn jarııalaıdy. Baıqaý negizinde HBK búkil oqý kezeńine ishki granttar bóledi. «Otanǵa barar jol» baıqaýy birneshe kezeńnen turady jáne onlaın formatta ótkiziledi. Negizgi kezeńde, baıqaýǵa qatysýshylar Instagram áleýmettik jelisinde «Qazaq halqynyń tarıhyndaǵy kórnekti tulǵalar» jáne «Men nege Halyqaralyq bilim berý korporatsııasyna túskim keledi» taqyryptarynda beıne-esseler usynady. Aqtyq synda qatysýshylar onlaın-suhbattasýdan ótedi», - dedi ol Ortalyq kommýnıkatsııalar qyzmetindegi brıfıng barysynda.

Sonymen qatar ol Qazaqstannyń barlyq joǵary oqý oryndaryn osy bastamaǵa qosylýǵa, shetelde turatyn jáne óz týǵan elimen birigýge umtylǵan otandastarymyzdy - etnıkalyq qazaqtardy qoldaýǵa shaqyrdy.

«Bolashaqta, eger elimizdegi 120-dan astam JOO-nyń árqaısysy 1 ishki granttan bólse, tıisinshe 120-dan astap talapker-qandas óz otbasylarymen birge týǵan jerinde óz bolashaǵyn tabýǵa múmkindik alady», - dedi Qaıyrjan Meńdiǵalıev.