Otandyq ZiK kompıýterleriniń serııalyq óndirisi iske qosyldy

PETROPAVL. QazAqparat - Petropavlda otandyq ZiK kompıýterleriniń óndirisi iske qosyldy, dep habarlaıdy QazAqparat QR IIDM baspasóz qyzmetine silteme jasap.

13 tamyzynan bastap «Qazaqstan ınjınırıng» ulttyq kompanııasynyń enshiles kásiporyny Kırov atyndaǵy zaýyt alǵashqy 5 myń kompıýter tehnıkasyn jınaqtaı bastady, olar eldiń bilim basqarmasyna jetkizilmek.

Buryn habarlanǵandaı 2020 jyldyń 1 shildesinde Maıkrosoft pen «S.M.Kırov atyndaǵy zaýyt» arasynda ZiK kompıýterlerin Windows 10 Pro lıtsenzııalyq operatsııalyq júıesimen jabdyqtaý týraly kelisimshartqa qol qoıylǵan bolatyn.

ZiK kompıýterleriniń birneshe úlgisi shildede Soltústik Qazaqstan oblysynyń bilim basqarmasynda qalalyq jáne aýyldyq mekemelerde arnaıy synaqtan ótken. Synaq nátıjeleri boıynsha noýtbýkter mektepte paıdalanýǵa usynyldy.

Qazirgi ýaqytta otandyq kompıýterler shyǵaratyn jobany lokalızatsııalaý úlesi shamamen 30% quraıdy. Paıyz birtindep artyp keledi, bul bolashaqta paıdalanýshylarǵa negizinen Qazaqstanda jasalǵan ónimderdi satyp alýǵa múmkindik beredi.

Zaýyt jyldyń aıaǵyna deıin tapsyrys berýshilerdiń suranysyna qaraı, taǵy 60 myńǵa jýyq derbes kompıýter men noýtbýk óndirýdi josparlap otyr.