Otandyq jıhaz materıaldarynyń 90%-y ımportqa táýeldi – kásipker

NUR-SULTAN. QazAqparat - Qazaqstanda jıhaz materıaldarynyń 90%-y syrttan keledi. Bul týraly Qazaqstannyń jıhaz jáne aǵash óńdeý ónerkásibi kásiporyndary qaýymdastyǵynyń prezıdenti Qanat Ibraev málim etti, dep habarlaıdy QazAqparat tilshisi.

«Pandemııaǵa deıin 2019 jylmen salystyrǵanda jıhaz materıaldarynyń baǵasy 2-3 esege ósken. Al keıbir materıaldar 35% - 40%-ǵa deıin qymbattady. Mysaly, buryn jıhaz taqtaıshasynyń baǵasy 6-7 myń teńge tursa, qazir ol 16-18 myńǵa jetip otyr. Bul búkil Qazaqstan boıynsha. Sonymen qatar fýrnıtýra baǵasynyń toqsan saıyn óskenin baıqap otyrmyz. Qazaqstandyq jıhaz materıaldarynyń 90 paıyzy ımportqa táýeldi», - dedi Qanat Ibraev Nur-Sultan qalasy kásipkerler palatasy óńirlik keńesiniń eseptik kezdesýinde.

Onyń aıtýynsha, pandemııa kezinde Reseı plıta materıalyn eksporttaýǵa tyıym saldy.

«Bul kútpegen jaǵdaı boldy. Sońy baǵanyń ósýine alyp keldi. Esesine Reseı ishki naryǵyn qamtamasyz etti. Pandemııaǵa qatysty alasapyrannan Reseıdiń ózinde de tapshylyq boldy. Al Qazaqstanǵa materıaldyń 96 paıyzy osy el arqyly keledi. Biz máseleni memlekettik organdar deńgeıinde kóterdik. Saýda jáne ıntegratsııa, Indýstrııa jáne ınfraqurylymdyq damý mınıstrlikteri ýaqytyly qoldaý kórsetti. Máseleni sheshý úshin bólinetin kvotanyń kólemin arttyrdy. Búginde materıal tapshylyǵy joq», - deıdi ol.

Buǵan deıin Qostanaıda 300 júk kóliginiń júrgizýshisi jumyssyz qalǵanyn habarlaǵan edik.

Aıta keteıik, búgin Nur-Sultan qalasy kásipkerler palatasynyń óńirlik keńesiniń otyrysy ótti.

Atalǵan jıynda shetel ınvestorlarynyń Qazaqstan naryǵyna asa qyzyǵýshylyq tanytyp otyrǵany aıtyldy.