Otandyq jas ǵalymdar NASA-nyń zertteý jobalaryna qatysýy múmkin

QYZYLORDA. QazAqparat – Otandyq jas ǵalymdar NASA ǵarysh agenttiginiń Qazaqstan jáne Ortalyq Azııada júrgizetin ekologııalyq zertteý jobalaryna qatysýy múmkin, dep habarlaıdy QazAqparat tilshisi.

«Bul – amerıkalyq taraptyń qoldaýymen iske asyp jatqan joba. Qazirgi ýaqytta NASA-men birlesip ǵylymı joba daıyndap jatyrmyz. Ol Aral teńizi tartylýynyń álemdik klımatqa áserin zertteýge baǵyttalady. Aldaǵy ýaqytta mundaǵy jas ǵalymdardyń NASA ǵarysh agenttiginiń Qazaqstan jáne Ortalyq Azııada júrgizetin ekologııalyq zertteý jobalaryna qatysý múmkindigi bar», – dedi Mıchıgan memlekettik ýnıversıtetiniń (AQSh) professory Djıhýan Chen Qorqyt ata ýnıversıtetiniń jas zertteýshilerimen kezdesý barysynda.

Otandyq jas zertteýshiler professor Djıhýan Chenniń jetekshiligimen Qyzylorda oblysynyń aýmaǵyndaǵy dalalyq jumystarǵa qatysqan. Zertteýler negizinen atalǵan aýmaqtyń ekologııalyq máselelerin anyqtaýǵa, olardy sheshýge arnalǵan.

Ǵalymdar Qyzylorda oblysyndaǵy ósimdik dúnıesin zertteýge nıetti. Oblystyń 100 jyl boıyndaǵy ósimdik dúnıesindegi ózgeristerdi kestege engizbek. Ǵalymdardyń aıtýynsha, bul aldaǵy júzjyldyqqa boljam jasaýǵa septigin tıgizedi.

AQSh-pen birlesip iske asyp jatqan zertteýlerge otandyq 10 ýnıversıtettiń ǵalymdary qatysyp jatyr. Joba quny – 38 myń dollar.