Otandyq jáne sheteldik kompanııalardyń bir top basshysy Astana qurylysyna qosqan eleýli úlesteri úshin memlekettik nagradalarmen marapattaldy
ASTANA. Shildeniń 7-si. QazAqparat - Qazaqstan Respýblıkasynyń Prezıdenti Nursultan Nazarbaev Astana kúni qarsańynda elimizdiń bas qalasy Astananyń qurylysyna eleýli úles qosqan otandyq jáne sheteldik kompanııalardyń bir top basshylaryn memlekettik nagradalarǵa laıyq dep tapty, dep habarlaıdy qala ákiminiń baspasóz qyzmeti.
2010 jylǵy shildeniń 6-sy kúni tańerteńgilik Elbasynyń tapsyrmasymen Astana qalasynyń ákimi Imanǵalı Tasmaǵambetov «Qurmet» ordenin «AQQB Jańa qurylys» JShS dırektory Gúlnar Ybraıymbaeva men «ISK «ASI» JShS dırektory Sergeı Kotlıarovqa tapsyrdy. «Eren eńbegi úshin» medalin «Sembol Ýlýslararsy» AQ fılıalynyń jumysshysy Kenjebek Ibragımov pen Baltabaı Serkebaevqa jáne «Bazıs-A» Korporatsııasy №1 fılıalynyń bas dırektory Seıtjapar Álimjanovqa tabys etti.
Qazaqstan Respýblıkasynyń Qurmet gramotasy «Bazıs-A Korporatsııasy» JShS №1 fılıalynyń atqarýshy dırektory Nurlan Berdıevke tabys etildi.
Shildeniń 5-i kúni «Han Shatyr» SOO saltanatty ashylý rásimi qarsańynda I.Tasmaǵambetov II dárejeli «Dostyq» ordenin «Rixos» qonaq úıler jelisiniń dırektorlar keńesiniń basqarma tóraǵasy Fettahe Tamındjege jáne «Sembol Inshaat» AQ dırektorlar keńesiniń basqarma tóraǵasy Týfan Aıtekin Gúltekinge tabys etken bolatyn.
«Elbasymyzdyń osy qala kúniniń qarsańynda sizderdi memlekettik nagradamen marapattaýynyń ózindik máni bar. Sizderdiń eńbekterińiz joǵary baǵalanyp otyr. Sizderdiń úlken ujymdaryńyz bar, osy úlken ujymnyń eńbegi bul. Sondyqtan da bizdiń osy merekelik quttyqtaýymyzdy olarǵa jetkizińizder. Eńbekterińizge tabys tileımin. Mereke qutty bolsyn!», - dedi I.Tasmaǵambetov olardy marapattaý kezinde sóılegen sózinde.
Ákim merekelik sharalarǵa kelgen resmı delegattardyń da Qazaqstan Prezıdenti Nursultan Nazarbaevtyń tikeleı tapsyrmasymen qurylys salasyn memlekettik qoldaýdyń arqasynda múmkin bolǵan qazaqstandyq qurylysshylardyń sátti eńbekterin oń baǵalap jatqanyn atap ótti. Atap óter bolsaq, Máskeý meri ıÝrıı Lýjkov 16 mıllıonnan astam halqy bar RF elordasynda jylyna 3,5 mıllıon sh.m. turǵyn paıdalanýǵa beriletindigin málim etken. Al 700 myń turǵyny bar Astanada bul kórsetkish qarjylyq daǵdarysqa qaramastan 1,3 mln. sh.m-di quraıdy. Salystyrý úshin ol 1991 jyly mıllıon turǵyny bar Almatyda salynǵan 900 myń sh.m. turǵyn úı jaqsy kórsetkish bolǵanyn atap ótti.
«Bul Elbasynyń jáne el úkimeti tarapynan Astanadaǵy turǵyn úı salasyna basa nazar aýdarylyp otyrǵanyn kórsetedi. Osynyń arqasynda elimizde bıznes pen memlekettik resýrstar kúshin biriktirip, osyndaı aýqymdy mindetterdiń sheshimin taýyp otyr», - dedi Astana ákimi.
