Otandyq jáne halyqaralyq sarapshylar memlekettik aýdıttiń mańyzdylyǵyn talqylap jatyr
«Qazirdiń ózinde aldaǵy onjyldyq biz úshin ǵana emes, búkil álemdik qoǵamdastyq úshin de ońaı bolmaıtyny anyq. Sondyqtan qoǵam kez-kelgen syn-tegeýrin men qaýipterge daıyn, al memleket basqarýdyń barlyq salasyn úzdiksiz jetildirilip otyrýy tıis. Bizdiń búgingi konferentsııamyzdyń taqyryby qazirgi, tez ózgeretin zamanda memlekettik aýdıt júıesin odan ári damytýdyń basym baǵyttaryn qaıta qaraýǵa arnalyp otyr. Memlekettik áleýmettik aýdıttiń praktıkalyq mańyzy josparly ındıkator men naqtylyq arasyndaǵy alshaqty azaıtqanda ǵana óz tıimdiligin kórsetedi», - dedi QR Esep komıtetiniń tóraǵasy Natalıa Godýnova halyqaralyq konferentsııanyń ashylý saltanatynda.
Komıtet basshysynyń málimdeýinshe, COVID-19 indeti memlekettik basqarý júıesinde áleýmettik faktordyń mańyzdylyǵyn ózekti etti.
«Osy oraıda memleket pen qoǵamnyń erikti dıalogy negizinde áleýmettik-ekonomıkalyq qatynastardy retteýdiń neǵurlym tıimdi quraly retinde áleýmettik aýdıttiń rólin ashyp kórsetýge mán berip otyrmyn. Biz elimizde aýdıtorlyq is-sharalarmen qatar, Prezıdent Ákimshiligimen birlesip, memlekettik organdardyń azamattarmen ózara is- qımyl tıimdiligin baǵalaý boıynsha jumys jasap jatyrmyz. Ondaǵy maqsat - memlekettik qyzmetterdi sapaly kórsetý jáne shaǵymdar men ótinishterdi qaraý, sondaı-aq memlekettik organdardyń ashyqtyǵyn qamtamasyz etý boıynsha tıimdilikti aıqyndaýǵa baǵyttalǵan», - deıdi ol.
Aıta ketsek, búgin elordada onlaın-formatta Esep komıtetiniń 25 jyldyǵyna arnalǵan «Jańa tarıhı shyndyq jaǵdaıyndaǵy memlekettik aýdıt júıesi» atty halyqaralyq ǵylymı-praktıkalyq konferentsııa ótip jatyr.
Atalǵan sharaǵa Prezıdent Ákimshiligi, QR Úkimeti men qatar 27 eldiń joǵary aýdıt organdarynyń ókilderi, sonymen qatar 11 joǵary oqý orny men 17 tekserý komıssııasynyń ókilderi qatysyp jatyr.
Sondaı-aq, halyqaralyq konferentsııada Reseı Federatsııasy Esep palatasynyń tóraǵasy Alekseı Kýdrın, Belarýs Respýblıkasy Memlekettik baqylaý komıtetiniń tóraǵasy Vasılıı Gerasımov jáne Qytaı Halyq Respýblıkasy Ulttyq aýdıt ofısiniń aýdıtorlyq zertteýler ınstıtýtynyń bas dırektory Dzıang Dzıanhýa jáne basqa da qurmetti qonaqtar quttyqtaý sóz sóıledi.
