Otandyq zańnama halyqaralyq quqyq normalaryna sáıkestendiriledi – Kemelbek Oıshybaev

NUR-SULTAN. QazAqparat – Otandyq zańnama «sóz bostandyǵy» máselelerin retteıtin halyqaralyq quqyq normalaryna sáıkestendiriledi. Bul týraly QR Aqparat jáne qoǵamdyq damý vıtse-mınıstri Kemelbek Oıshybaev aıtty, dep habarlaıdy QazAqparat tilshisi.

«Mınıstrlik BAQ salasyndaǵy naqty ahýaldy zerdeleýde. Halyqaralyq tájirıbege taldaý jasap, zańnamaǵa túzetýler ázirleýde. Biz BAQ pen qoǵamdyq uıym basshylarynyń usynystaryn taldap, jınaqtaımyz. Kelesi jyly qoǵamdyq jumys tobyn quryp, talqylaýǵa shyǵaramyz.

Mınıstrlik zań jobasyn ázirleý kezinde ashyqtyq, jarııalylyq qaǵıdattaryn ustanyp, sala sýbektileriniń pikirin eskeredi», - dedi ol elordada ótip jatqan buqaralyq medıan zańnamalyq retteý týraly konferentsııada.

Onyń aıtýynsha, zańnamalyq ózgeristerdi ázirleýdegi maqsat – otandyq BAQ-tyń básekege qabilettiligin arttyrý úshin qolaıly jaǵdaılar jasaý jáne jýrnalısterdiń quqyqtaryn qorǵaý.

«Biz aldymyzǵa mynadaı mindetterdi qoıyp otyrmyz:

- basqa elderdiń BAQ salasyndaǵy halyqaralyq tájirıbesin jáne olardy qoldaný praktıkasyn zerdeleý;

- otandyq zańnamany «sóz bostandyǵy» máselelerin retteıtin halyqaralyq quqyq normalaryna sáıkestendirý;

- aqparat ázirleý, alý jáne taratý protsesterimen baılanysty qoǵamdyq qatynastardy retteý;

- BAQ máselelerin retteıtin qoldanystaǵy ulttyq zańnamanyń olqylyqtary men qaıshylyqtaryn joıý», - dedi Kemelbek Oıshybaev.