Otandyq tynys alý apparattary alǵash bolyp Maqtaaral aýdanyna jetkizildi

MAQTAARAL. QazAqparat – QR Indýstrııa jáne ınfraqurylymdyq damý mınıstrliginiń uıymdastyrýymen «Qazaqstan Injınırıng» AQ jasaǵan 10 ókpeni jasandy jeldetý apparaty respýblıkada eń alǵashqy bolyp Túrkistan oblysynyń Maqtaaral aýdanyna jetkizildi, dep habarlaıdy QazAqparat tilshisi.

Kókshetaý qalasynda óndirilgen otandyq ónimdi 2 myńǵa jýyq shaqyrym jerden Maqtaaral aýdanyna alyp kelýge «Azala grýpp» kompanııasy atsalysty.

Aýdan ortalyǵyndaǵy «Myrzakent» maqta zaýyty men Shymkent qalasyndaǵy «Azala tekstıl» fabrıkasyna ıelik etetin kompanııanyń basqarýshy dırektory Berik Qydyralıev jasandy tynys alý apparattaryn aýdandyq «Myrzakent» aýrýhanasy men «Atakent» aýrýhanasyna tabystady. Atalǵan shara barysynda aýdan ákiminiń orynbasary Sáken Sultanhanov apparattardy jetkizýge atsalysqan barsha azamattarǵa alǵysyn bildirip, aýdanda osyndaı jasandy tynys alý apparattarynyń sanynyń ósýine jáne dári-dármekterdiń jetkilikti bolýyna baılanysty pnevmonııamen aýyratyndardyń sany turaqtap jatqanyn aıtty.