Otandyq týrızmge arnalǵan ulttyq portal iske qosylady
Buǵan deıin habar etkenimizdeı úsh aıǵa sozylǵan «Uly Dala eline saıahat» atty ekspedıtsııa óz máresine jetken bolatyn.
«Kazakh Tourism» basshylyǵy aıtqandaı ekspedıtsııa barysynda jınalǵan materıaldar men aqparattar saralanyp sonyń negizinde elimizde jańa týrıstik baǵdarlar ashylady.
Odan bólek elimizdegi týrıstik aımaqtar boıynsha foto jəne vıdeo qorlar jınaqtalýda, jáne de ekspedıtsııa qorytyndysy boıynsha «Kazakh TV» telearnasynda týrıstik nysandarǵa barýǵa qatysty arnaıy baǵdarlama jaryqqa shyǵady.
Joǵaryda atalǵan jumystardyń basyn bir ortalyqtandyratyn, sonymen qatar ishki týrızm men syrttan keletin týrısterdi kóptep tartý maqsatynda elimizde biregeı ulttyq portal iske qosylady.
«Ekspedıtsııanyń taǵy bir maqsaty - Qazaqstannyń ásem jerleri men týrıstik oryndaryn kórsetetin derek qoryn jasaý. Bizdegi týrıstik nysandarǵa qatysty vıdeo men fotolar qory bar, biraq olar jetkiliksiz jáne ony jańartý kerek, osy sebepti ekspedıtsııadan jınalǵan materıaldardy júıelep týrıstik oryndardyń bazasyn quramyz. Sóıtip osy aıdyń ortasynda Kazakhstan Travel atty ulttyq portalymyzdy iske qosamyz. Qazirgi tańda portaldy reınnovatsııadan ótkizip jatyrmyz», - dedi «Kazakh Tourism» AQ-nyń basqarma tóraǵasy Rashıd Kúzembaev.
Sonymen qatar Kazakh Tourism basshysy 2023 jyly elimizde týrızmdi damytýǵa arnalǵan memlekettik baǵdarlamanyń qabyldanatynyn jáne oǵan daıyndyqtyń bastalyp ketkenin de tilge tıek etti.
